Azərbaycanın işğal altında qalan ərazisində islam irsindən olan minlərlə mədəni və tarixi abidələr məhv edilib və talan olunub. Trend-in məlumatına görə, bunu xarici işlər naziri Elmar Məmmədyarov İslam Əməkdaşlığı Təşkilatının (keçmiş İKT) Xarici İşlər Nazirləri Şurasının Astanada keçirilən 38-ci sessiyasında çıxışı zamanı deyib.
"İslam dünyasına və İKT-nin baş katibinə Azərbaycanın iyirmi faiz ərazisinin Ermənistanın işğalı altında qalması ilə nəticələnən və Ermənistanla davam edən silahlı münaqişədə Azərbaycana göstərdikləri güclü dəstəyə görə bir daha səmimi minnətdarlığımı ifadə etmək istərdim. Etnik təmizləmə nəticəsində təxminən bir milyon azərbaycanlı öz torpaqlarından qovulub, həmçinin İslam irsindən olan minlərlə Azərbaycan mədəni və tarixi abidələri məhv edilib və talan olunub", - Məmmədyarov əlavə edib. Məlumatı XİN-in mətbuat xidməti yayıb.
Nazirin sözlərinə görə, Azərbaycan dövləti beynəlxalq hüququn norma və prinsiplərinə, müvafiq BMT Təhlükəsizlik Şurası və İKT qətnamələrinin yerinə yetirilməsinə, həmçinin Avropa Təhlükəsizlik və Əməkdaşlıq Təşkilatı, Avropa Şurası və Avropa Parlamenti tərəfindən qəbul edilmiş müvafiq sənədlərə və qərarlara hörmətə əsaslanaraq, uzadılmış münaqişənin sülh yolu ilə tənzimlənməsinə sadiq qalır.
Nazir E.Məmmədyarov demişdir: "Bütün bu sənədlər yekdilliklə Azərbaycanın ərazi bütövlüyünü dəstəkləyir".