Amerika-İsrail İctimai Əlaqələr Komitəsinin Los-Anceles şəhərində keçirilmiş illik ziyafətinə ABŞ Konqresi və İsrail Knessetinin üzvləri ilə yanaşı, natiq qismində yeganə xarici ölkənin diplomatı - Azərbaycanın Los-Ancelesdəki baş konsulu Elin Süleymanov dəvət edilmisdir.
ABŞ-ın nüfuzlu yəhudi lobbisinin min nəfərdən çox üzvünün, eləcə də Birləşmiş Ştatların qanunverici və icraedici orqanının yüksək vəzifəli nümayəndələrinin qatıldıqları tədbirdə Azərbaycanın geosiyasi rolu və İsraillə dostluq münasibətləri vurğulanmışdır.
Azərbaycanın Los-Ancelesdəki baş konsulu Elin Süleymanov çıxışında xalqımıza məxsus tolerantlıq ənənələrindən danışmış, yəhudi icmasının Azərbaycanda çoxəsrlik tarixi barədə məlumat vermişdir.
Diplomat Prezident İlham Əliyevin sivilizasiyalararası dialoqun möhkəmlənməsinə böyük önəm verdiyini bildirmişdir. Yəhudi, xristian və müsəlmanların çoxsaylı ümumi dəyərləri paylaşmalarını, ən başlıcası Vahid Tanrıya inamlarını diqqətə çatdıran Elin Süleymanov Yaxın Sərqdə davamlı sülhün bərqərar olacağına ümidini ifadə etmişdir.
Ermənistan-Azərbaycan, Dağlıq Qarabağ münaqişəsi haqqında məlumat verən diplomat rəsmi Bakının problemin həlli istiqamətində səylərinə toxunmuşdur.
Sonda bas konsul Azərbaycan və İsaril də daxil olmaqla, ABŞ-ın əsas tərəfdaşları ilə uzunmüddətli strateji münasibətlər qurmasının vacibliyini qeyd etmişdir.

Şəfəq Akifqızı AzərTAc-ın xüsusi müxbiri
Vaşinqton