Türkiyənin dövlət naziri və Avropa İttifaqı ilə danışıqlar üzrə baş müzakirəçisi Egemen Bağış Ankarada türk, ABŞ və erməni jurnalistləri ilə görüşündə bildirmişdir ki, Azərbaycanın ərazi bütövlüyü Türkiyə üçün mühüm məsələdir. Onun sözlərinə görə, gələcəkdə də Türkiyə-Ermənistan normallaşma prosesində Azərbaycan ilə Ermənistan arasındakı münaqişənin həlli ön plana çıxan məsələlərdən biri olacaqdır.  
Egemen Bağış demişdir ki, Ankara Azərbaycan ilə Ermənistan arasında problemin davamlı həllini istəyir və bundan sonra regionda yeni fürsətlər meydana çıxa bilər. Bu münaqişənin nizama salınması bütün ölkələrin mənafeyinə uyğundur.
Ermənistanla sərhədlərin açılmasına dair sualı cavablandıran türkiyəli nazir bildirmişdir ki, Azərbaycan ilə Ermənistan arasında sülhə nail olunduqdan bir gün sonra bu sərhədlər açıla bilər. Egemen Bağış əlavə etmişdir ki, Türkiyə bütün qonşularla "sıfır problem" siyasəti yürüdür və onların da bu siyasətə oxşar cavab verməsini arzu edir.
Qondarma "erməni soyqırımı" ilə bağlı suala cavabında isə Egemen Bağış 1915-ci il hadisələrində həm türklərin, həm də ermənilərin zərər çəkdiyini, tarixi saxtalaşdırmağın mümkün olmadığını söyləmişdir.

Oqtay BAYRAMOV AzərTAc-ın xüsusi müxbiri
Ankara