Ermənistandan qaçqın düşən azərbaycanlılara Azərbaycan vətəndaşlığının verilməsi onların Dağlıq Qarabağ münaqişəsi həll edildikdən sonra geri qayıtması üçün heç bir problem yaratmayacaq.
Trend-in məlumatına görə, bunu jurnalistlərə Baş nazirin müavini, Qaçqın və Məcburi Köçkünlərin İşləri üzrə Dövlət Komitəsinin sədri Əli Həsənov demişdir: "2001-ci ildə Heydər Əliyevin Ermənistandan qaçqın düşənlər üçün yeni qəsəbənin inşası barədə verdiyi fərmanda Ermənistan vətəndaşlarının qaçqın statuslarının saxlanması barədə qeyd var. "Ermənistandan qaçqın düşən azərbaycanlıların bu statusu, onların o torpaqlara dönmək imkanları qalır". Onun sözlərinə görə, Azərbaycanın işğal altında olan torpaqları azad edildikdən sonra növbəti məsələ qaçqınların Ermənistana qaytarılması olacaq: "Azərbaycan heç zaman o torpaqlardan əl çəkməyəcək. Həmin torpaqlar bizim dədə-baba torpaqlarımızdır. Ermənilər orada dövlətlərini yaradıb, insanlarımızı qovublar. Amma həmin ərazilər Azərbaycan torpaqlarıdır. Biz o əraziləri müstəqil Azərbaycan torpağı kimi iddia etməsək də, insanlarımızın orada yaşamasını iddia edəcəyik".
Qeyd edək ki, 1988-1990-cı illərdə 200 min azərbaycanlı Ermənistandan deportasiya olunub.