Mərkəzi Seçki Komissiyasının (MSK) mətbuat xidmətindən bildirmişlər ki, mayın 6-da Məzahir Pənahovun sədrliyi ilə MSK-nın iclası keçirilmişdir.
Əvvəlcə 54 saylı Dəvəçi-Siyəzən seçki dairəsinin adında və ərazisinin tərkibində bəzi dəyişikliklərin edilməsinə dair məsələyə baxılmış və qərara alınmışdır ki, 54 saylı Dəvəçi-Siyəzən seçki dairəsi 54 saylı Şabran-Siyəzən seçki dairəsi adlandırılsın və "Azərbaycan Respublikasının Dəvəçi rayonunun inzibati ərazi bölgüsündə qismən dəyişikliklər edilməsi haqqında" Azərbaycan Respublikasının 2010-cu il 2 aprel tarixli Qanununa uyğun olaraq 54 saylı Şabran-Siyəzən seçki dairəsinin ərazisinin tərkibində müvafiq dəyişikliklər edilsin.
Sonra Azərbaycan Respublikasının Milli Məclisinə seçkilərin keçirilməsi ilə bağlı normativ xarakterli bəzi aktlar təsdiq edilmişdir.
MSK 118 saylı Ağdam şəhər dairə seçki komissiyasının tərkibində dəyişiklik edilməsi barədə qərar çıxarmışdır.
İclasda cari məsələlərə də baxılmışdır.
Mərkəzi Seçki Komissiyasının iclasında ABŞ səfirliyinin, Milli Demokratiya İnstitutunun (ABŞ) təmsilçiləri və kütləvi informasiya vasitələrinin nümayəndələri iştirak etmişlər.
AzərTAc{nl}