Azərbaycanın xarici işlər naziri Elmar Məmmədyarov ABŞ-a işgüzar səfəri çərçivəsində iyunun 1-də Nyu-Yorkda Asiya ölkələrinin BMT yanında daimi nümayəndələri ilə görüşmüşdür. 
Xarici İşlər Nazirliyinin mətbuat xidmətindən bildirmişlər ki, nazir BMT-nin Təhlükəsizlik Şurasının 2012-2013-cü illər üçün qeyri-daimi üzvlüyünə cari ilin oktyabrında keçiriləcək seçkilərdə Azərbaycanın namizədliyinin irəli sürüldüyünü, ölkəmizin namizədliyi ilə bağlı nəzərəçarpan üstünlükləri iştirakçıların diqqətinə çatdırmışdır. E.Məmmədyarov bu seçkilərdə ölkəmizin namizədliyini dəstəkləməyə çağırmışdır.
Görüşdə vurğulanmışdır ki, Azərbaycanda müstəqil siyasət aparılır. Bölgədə aparıcı dövlət olan ölkəmiz Xəzər-Qafqaz məkanında regional əməkdaşlığın inkişafında, xüsusən regional enerji və nəqliyyat layihələrinin həyata keçirilməsində mühüm rol oynayır. Qeyd olunmuşdur ki, BMT və digər beynəlxalq təşkilatlar çərçivəsində bir sıra vacib layihələrin müəllifi olduğu Azərbaycan coğrafi baxımından Avropa və Asiya arasında körpü rolunu oynayır və sivilizasiyalararası dialoqa böyük töhfə verir.
Eyni zamanda, E.Məmmədyarov Ermənistan-Azərbaycan, Dağlıq Qarabağ münaqişəsi ilə bağlı danışıqlar prosesi haqqında ətraflı məlumat vermişdir.
Nazir BMT-nin Təhlükəsizlik Şurasının 1993-cü ildə Ermənistan qoşunlarının Azərbaycanın işğal edilmiş ərazilərini azad etməsi ilə bağlı qəbul etdiyi dörd qətnamənin Ermənistan tərəfindən hələ də yerinə yetirilmədiyini təəssüflə qeyd etmişdir. E.Məmmədyarov BMT-nin Nizamnaməsinə əsasən, Təhlükəsizlik Şurasının bu cür qətnamələrinin BMT-yə üzv dövlətlər tərəfindən yerinə yetirilməsi öhdəliyinin olmasını vurğulamışdır.
Görüşdə bir sıra qarşılıqlı maraq doğuran məsələlər ətrafında fikir mübadiləsi aparılmışdır.

AzərTAc