Dağlıq Qarabağ münaqişəsi ilə bağlı baza prinsipləri barəsində razılığa gəlməyin vaxtı çatıb. ABŞ-ın Azərbaycandakı səfiri Metyu Brayza çərşənbə axşamı Lənkəranda jurnalistlərə deyib: "ABŞ və digər həmsədr ölkələrin Dovil bəyanatı regionda sabitliyin bərqərar olması baxımından düzgün bəyanatdır. Dağlıq Qarabağ münaqişəsi ilə bağlı baza prinsipləri barəsində razılığa gəlməyin vaxtı çatıb".
- Brayza bildirib ki, baza prinsipləri yekun sülh sazişi olmasa belə, razılaşmanın təməlini qoya bilər. Rəsmi Bakı hesab edir ki, Ermənistan Rusiya, ABŞ və Fransa prezidentlərinin Dağlıq Qarabağ münaqişəsinə dair son bəyanatından nəticə çıxarmalıdır.
Prezident Administrasiyasının xarici əlaqələr şöbəsinin müdiri Novruz Məmmədov ötən həftə bununla bağlı açıqlama vermişdir:"Əlbəttə, biz prezidentlərin Fransanın Dovil şəhərində "səkkizlər"in görüşü zamanı verdikləri bəyanatı alqışlayırıq. Prezidentlər Barak Obama, Dmitri Medvedev və Nikola Sarkozinin münaqişənin indiyədək həll olunmaması ilə bağlı narahatlıqları başa düşüləndir və məmnunluq doğurur. Buna görə də onlar münaqişənin tezliklə danışıqlar yolu ilə həllinin vacibliyini vurğulayırlar, biz də buna böyük əhəmiyyət veririk".