Mayın 26-da Avropa İttifaqının (Aİ) Azərbaycandakı nümayəndəliyinin rəhbəri, səfir Roland Kobia Avropa Qonşuluq Siyasəti çərçivəsində Avropa Komissiyasının qəbul etdiyi Azərbaycan üzrə illik tərəqqi hesabatının təqdimatı ilə bağlı mətbuat konfransı keçirmişdir.  
R.Kobia bildirmişdir ki, hesabatda Azərbaycanın bir çox sahələrdə, xüsusilə də Avropa Qonşuluq Siyasəti üzrə Fəaliyyət Planının həyata keçirilməsi, makroiqtisadi sabitliyin təmin olunması, yoxsulluğun səviyyəsinin azaldılması istiqamətində əldə etdiyi mühüm irəliləyişlər əks olunmuşdur.
Diplomat qeyd etmişdir ki, Azərbaycan ilə Aİ arasında enerji sahəsində əməkdaşlığın inkişafının xüsusi vurğulandığı sənəddə mütəşəkkil cinayətkarlığa, terrorizmə, insan alverinə qarşı mübarizə, eləcə də gender bərabərliyinin təmin olunması sahəsində qazanılmış uğurlar komissiya tərəfindən yüksək qiymətləndirilmişdir.
R.Kobia demişdir ki, son vaxtlar Azərbaycanda korrupsiyaya qarşı mübarizə sahəsində mühüm tədbirlərin həyata keçirilməsi, eləcə də Azərbaycan ilə Aİ arasında Assosiativ Sazişin imzalanması ilə bağlı danışıqların uğurla davam etdirilməsi hesabatda təqdirəlayiq hal kimi qiymətləndirilir.
Səfir hesabatda, həmçinin Ermənistan-Azərbaycan, Dağlıq Qarabağ münaqişəsinin həlli istiqamətində danışıqların davam etdirilməsinin dəstəkləndiyini vurğulamışdır.
Sonda R.Kobia jurnalistlərin suallarını cavablandırmışdır.