Azərbaycanın Pakistandakı səfiri Daşqın Şikarov bu ölkənin Birləşmiş Qərargah Rəisləri Komitəsinin sədri, ordu generalı Xalid Vayn ilə görüşmüşdür.
Səfirlikdən bildirmişlər ki, görüşdə diplomat Azərbaycanın dünyada və regionda artan nüfuzu, iqtisadi inkişafı, ordu quruculuğu sahəsində islahatlar, Ermənistan-Azərbaycan, Dağlıq Qarabağ məsələsi və münaqişənin nizamlanması ilə bağlı danışıqlar prosesi, Ermənistanın işğalçı siyasəti və s. barədə komitənin sədrinə ətraflı məlumat vermişdir.
Səfir Pakistanın hər zaman Ermənistan-Azərbaycan, Dağlıq Qarabağ münaqişəsinin həllinə dair Azərbaycanın ədalətli mövqeyini birmənalı şəkildə dəstəklədiyini xüsusi vurğulamışdır.
D.Şikarov qeyd etmişdir ki, Pakistanın münaqişənin Azərbaycanın maraqlarına uyğun, ədalətli həllinə tərəfdar olması və məhz bu səbəbdən Pakistan tərəfindən Ermənistanın dövlət kimi tanınmaması ölkəmizdə yüksək qiymətləndirilir.
Diplomat Pakistan hökumətinə və xalqına ölkəmizin mövqeyini daim dəstəklədiyinə görə minnətdarlığını bildirmişdir.
Ordu generalı X.Vayn Azərbaycanın mövqeyini daim dəstəklədiklərini və bundan sonra da ölkəmizin yanında olacaqlarını, Dağlıq Qarabağ münaqişəsi həll olunmayanadək Ermənistanı dövlət kimi tanımayacaqlarını bəyan etmişdir.
Səfir Azərbaycanın müdafiə naziri, general-polkovnik Səfər Əbiyevin adından Xalid Vaynı cari ilin ikinci yarısında Azərbaycana rəsmi səfərə dəvət etmişdir. Pakistanın ordu generalı dəvəti böyük məmnuniyyətlə qəbul etmiş və oktyabrda Azərbaycana səfər edəcəyini bildirmişdir.