Türkiyənin Baş naziri Rəcəb Tayyib Ərdoğan Qars ictimaiyyəti qarşısında seçkiqabağı çıxışında Naxçıvan Ali Məclisinin sədri Vasif Talıbovun ermənilərlə mövcud olmayan "dostluğu" əks etdirən abidənin sökülməsi üçün təşəkkür məktubunu oxumuş, Türkiyənin Azərbaycan və Naxçıvan ilə qardaşlığının əbədi olduğunu vurğulamışdır. 
Baş nazir demişdir ki, əgər qardaşlıqdan söhbət gedirsə, bizim Azərbaycan və Naxçıvan ilə əzəli qardaşlığımız vardır. Söhbət sülhdən gedirsə, biz Ermənistana bütün xoş niyyətimizlə kompromis təklif etdik. İndi növbə Ermənistanındır. Biz bu ölkənin diasporun təsirindən qurtulmasını və addım atmasını gözləyirik. Belə bir zamanda ölkəmizdə təəssüf ki, bəzi güclər onların vəkilliyini edirlər.
Rəcəb Tayyib Ərdoğan Azərbaycan Respublikası Dövlət Neft Şirkəti tərəfindən Qarsda inşa olunacaq ulu öndər Heydər Əliyevin adına liseyin təməlqoyma mərasimində də böyük sevinclə iştirak edəcəyini vurğulamışdır. Baş nazir Prezident İlham Əliyevə və bütün Azərbaycan xalqına təşəkkürünü bildirmişdir.

Oqtay BAYRAMOV AzərTAc-ın xüsusi müxbiri
Qars