"Azərbaycan Xarici İşlər Nazirliyi Kollektiv Təhlükəsizlik Müqaviləsi Təşkilatının Baş katibinin Dağlıq Qarabağ münaqişəsinin sülh yolu ilə həll olunmasının vacibliyinə dair bəyanatını alqışlayır.
Ümid edirik ki, təşkilat erməni tərəfini müharibə ehtimalından qaçmaq üçün öz qoşunlarını Azərbaycanın işğal olunmuş ərazilərindən çıxarmağın zəruriliyinə inandıracaq". Bu barədə APA-ya KTMT Baş katibi Nikolay Bordyujanın Ermənistanda verdiyi bəyanatı şərh edən Azərbaycan XİN-in mətbuat xidmətindən bildirilib.
Ermənistanın müdafiə naziri Seyran Ohanyanın bəyanatına da münasibət bildirən mətbuat xidməti onun sözlərini nonsens adlandırıb: "Azərbaycan kiminsə ərazisinə iddia irəli sürmür və hər hansı dövləti hədələmir. Lakin Azərbaycan öz ərazi bütövlüyünü bərpa etmək üçün beynəlxalq hüquqda nəzərdə tutulan bütün mexanizmlərdən istifadə hüququnu özündə saxlayır. Ermənistan Azərbaycan ərazilərini işğal etmiş təcavüzkar bir ölkədir və hələ də Azərbaycana hədə-qorxu gəlir".
Xatırladaq ki, S. Ohanyan Azərbaycanın müharibəyə başlayacağı təqdirdə Ermənistanın KTMT üzrə müttəfiqlərinin dəstəyini almağa haqqı olduğunu söyləyib.