Mayın 19-da Minskdə MDB Hökumət Başçıları Şurasının 57-ci iclası işə başlamışdır. İclasda ölkəmizi Azərbaycan Respublikası Baş nazirinin birinci müavini Yaqub Eyyubov təmsil edir.
MDB Hökumət Başçıları Şurasının gündəliyinə əməkdaşlığın inkişafının bir neçə aktual məsələsi, o cümlədən azad ticarət zonası haqqında müqavilə və MDB Dövlət Başçıları Şurasının müvafiq qərarının layihəsi, 2020-ci ilədək dövr ərzində MDB ölkələrinin dövlətlərarası məqsədli innovasiya əməkdaşlığı proqramının ilkin layihəsinə hazırlığın gedişi, 2011-ci ildə MDB-də ərzaq təhlükəsizliyinin artırılması ilinin keçirilməsi tədbirləri ilə bağlı məsələlər salınmışdır. Tərəflər, həmçinin MDB-nin 20-ci ildönümünə həsr olunmuş dövlətlərarası sərgiyə hazırlığın gedişi, istehlakçıların hüquqlarının müdafiəsi sahəsində MDB-nin sahə əməkdaşlığı orqanının yaradılması məsələlərini, habelə Birlik dövlətlərinin 2020-ci ilədək dövr ərzində atom enerjisindən dinc məqsədlərlə istifadə sahəsində əməkdaşlığının "Atom-MDB" əməkdaşlığı çərçivə proqramı müzakirə ediləcəkdir.
Bundan əlavə, gündəliyə Birlik ölkələrinin mədəniyyət sahəsində əməkdaşlıq konsepsiyası və MDB ölkələrinin mədəniyyət və incəsənət sahələrində təhsilin inkişafı konsepsiyası məsələləri salınmışdır.
İclasda MDB ölkələrinin 2015-ci ilədək mədəniyyət sahəsində əməkdaşlığının əsas tədbirləri müzakirə edilir, MDB dövlətlərinin fundamental elm sahəsində əməkdaşlığı üzrə Şuranın yaradılması haqqında saziş nəzərdən keçirilir.

Zeynal AĞAZADƏ AzərTAc-ın xüsusi müxbiri
Minsk