Belarus Prezidenti Aleksandr Lukaşenko mayın 19-da Azərbaycan Baş nazirinin birinci müavini Yaqub Eyyubovla görüşündə bildirmişdir ki, Belarus göstərdiyi dəstəyə görə Azərbaycana minnətdardır.
Azərbaycan Prezidenti İlham Əliyevlə çox mehriban və səmimi münasibətləri olduğunu vurğulayan Aleksandr Lukaşenko demişdir: "Münasibətlərimizin əsası, o cümlədən bir-birimizə bəslədiyimiz xoş hisslərdədir".
Aleksandr Lukaşenko bildirmişdir ki, son beş ildə iki ölkə arasında əmtəə dövriyyəsi təxminən 5 dəfə, cari ilin ötən dövründə 2010-cu ilin müvafiq dövrü ilə müqayisədə 10 dəfə artmışdır.
Belarus dövlətinin başçısı demişdir: "Siz bizə çox kömək etdiniz. Təəssüf ki, bu gün müstəqilliyimiz və suverenliyimiz enerji daşıyıcılarına, xammala söykənir. Biz yüksək keyfiyyətli Azərbaycan nefti emal edirik. Siz, eləcə də Venesuela bizi müdafiə etdiniz, müstəqilliyimizi və suverenliyimizi xilas etdiniz. Odur ki, sizə səmimi-qəlbdən minnətdarıq". A.Lukaşenko vurğulamışdır ki, bu gün də tərəflər bir çox aktual istiqamətlər üzrə bir-biri ilə sıx əməkdaşlıq edirlər.
Aleksandr Lukaşenko bu yaxınlarda Bakıya səfəri zamanı əldə edilmiş razılaşmalara Belarusun sadiq qalacağının Azərbaycan Prezidenti İlham Əliyevə çatdırılmasını xahiş etmişdir. Belarus lideri demişdir: "Biz iqtisadiyyatdan tutmuş "Eurovision" müsabiqəsinədək bütün məsələlərdə sizin üçün həyəcan və narahatlıq keçiririk".
Onun sözlərinə görə, Azərbaycanın "Eurovision"da qələbəsi Azərbaycan mədəniyyətinin yüksək səviyyəsindən, Avropa mədəniyyətinə uyğun olmasından xəbər verir.
Yaqub Eyyubov öz növbəsində Azərbaycan Prezidenti İlham Əliyevin salamlarını Belarus dövlətinin başçısına çatdıraraq demişdir ki, iki ölkənin nazirlikləri, təşkilatları və şirkətləri bir-biri ilə uğurla əməkdaşlıq edirlər.

AzərTAc