Mayın 4-də Ədliyyə Nazirliyi Bələdiyyələrlə İş Mərkəzinin təşkilatçılığı ilə Şirvanda bələdiyyələrin fəaliyyətinin təşkilinə dair regional seminar keçirilmişdir.
Şirvan şəhəri, Hacıqabul, Sabirabad, Salyan və Neftçala rayonları bələdiyyə orqanları rəhbərlərinin iştirak etdiyi seminarda bələdiyyələrə keçirilmiş son seçkilərdə özünüidarə qurumları üzvlüyünə daha səriştəli, savadlı və səbatlı kadrların seçildiyi vurğulanmışdır. Qeyd edilmişdir ki, bu orqanların işini nizamlayacaq çoxlu sayda qanunvericilik aktları və sənədlər qəbul olunmuşdur.
Tədbirdə cəmiyyətin inkişaf strategiyasının ləyaqətlə həyata keçirilməsi, insanların sosial-iqtisadi problemlərinin həll edilməsi sahəsində yerli özünüidarə orqanlarının rolunun artırılmasının zəruriliyi göstərilmiş, bələdiyyələrin fəaliyyətində yol verilən hüquqpozmaları, qurumun öz seçiciləri qarşısında müntəzəm hesabat verərək şəffaflığa təminat yaratması, maliyyə resurslarından daha səmərəli istifadə olunması və sair məsələlər ətrafında açıq və prinsipial söhbət aparılmışdır.
Bələdiyyələrlə İş Mərkəzinin inzibati nəzarət idarəsinin rəisi Həbib Yusifovun bələdiyyələrin fəaliyyəti və qarşıda duran vəzifələr barədə məruzəsi dinlənilmişdir. Natiq mərkəz tərəfindən aparılmış araşdırmalar nəticəsində bələdiyyələrin fəaliyyətində çoxlu sayda qanun pozuntusu faktları aşkara çıxarıldığını vurğulamışdır. Bildirmişdir ki, müvafiq materiallar inzibati orqanlara təhvil verilmişdir.
İştirakçıları maraqlandıran bir sıra məsələlərə aydınlıq gətirilmişdir.
AzərTAc{nl}