APA xəbər verir ki, Prezident Administrasiyasının ictimai-siyasi məsələlər şöbəsinin müdiri Əli Həsənov Gürcüstanın bəzi rəsmilərinin ABŞ-ın Bakıdakı səfirliyi ilə birlikdə Azərbaycanda iğtişaşlar törətmək cəhdləri ilə bağlı mətbuatda gedən yazıları şərh edib: "İki ölkə arasında əlaqələrin korlanmasında maraqlı olan bu təxribatçı qruplar məqsədli şəkildə belə məlumatları irəli atır". 
Əli HƏSƏNOV bildirib ki, hazırda Cənubi Qafqazın əhəmiyyətli hərbi geostrateji mövqeləri, o cümlədən digər mexanizmləri Gürcüstanla Azərbaycanın əlində cəmləşib: " Cənubi Qafqazda həlledici sosial - siyasi münasibətləri Azərbaycan və onun tutduğu yol müəyyən edir. Bu ölkələrin birlikdə formalaşdırdığı müttəfiqlik münasibətləri Şərq-Qərb münasibətlərində bir geostrateji faktordur. Hökumət Prezident İlham Əliyevin başçılığı ilə bu istiqamətdə zəruri tədbirlər həyata keçirir".