Azərbaycan ilə Avropa İttifaqı arasında əlaqələr yüksələn xətlə inkişaf edir. Rəsmi Bakı münasibətlərimizin daha da genişlənməsində və möhkəmlənməsində maraqlıdır. İnanırıq ki, Avronestdə Avropa Parlamenti nümayəndə heyətinin rəhbərinin Bakıya səfəri əlaqələrimizin bundan sonra da uğurla inkişaf etməsinə öz töhfəsini verəcəkdir.
Bu sözləri Milli Məclisin sədri Oqtay Əsədov aprelin 22-də Azərbaycanda səfərdə olan Avronestdə Avropa Parlamenti nümayəndə heyətinin rəhbəri Xristian Vigeninlə görüşdə demişdir.
O.Əsədov bildirmişdir ki, Azərbaycan müstəqilliyini bərpa etdikdən sonra sürətlə Avropaya inteqrasiya edir. Biz bir çox beynəlxalq təşkilatlar, o cümlədən Avropa İttifaqı ilə sıx əlaqələr qurmuşuq və son 10 ildə münasibətlərimiz ikitərəfli əməkdaşlıq səviyyəsinə yüksəlmişdir. Ümid edirik ki, Avronestin fəaliyyəti bərpa olunduqdan sonra əməkdaşlığımız daha da genişlənəcəkdir.
O.Əsədov, Milli Məclisdə Avronestlə əlaqələrin inkişafına dair qrupun fəaliyyət göstərdiyini diqqətə çatdırmış, Azərbaycanın bu təşkilatlarla münasibətlərin qurulmasında və genişlənməsində maraqlı olduğunu bildirmişdir.
X.Vigenin Avropa Parlamentinin sədrinin salamlarını Oqtay Əsədova çatdırmışdır. O, Azərbaycanın Avropa İttifaqı və Avropa Parlamenti ilə əlaqələrini yüksək qiymətləndirmişdir. Qonaq demişdir ki, Avronest fəaliyyətə başladıqdan sonra Azərbaycan ilə ikitərəfli əlaqələrin inkişafına xüsusi diqqət yetirəcəkdir.
AzərTAc