Yeni Azərbaycan Partiyası (YAP) Səbail rayon qadınlar təşkilatının məclisi ümummilli lider Heydər Əliyevin anadan olmasının 87-ci ildönümü münasibətilə tədbir keçirmişdir.
Tədbir iştirakçıları əvvəlcə Fəxri Xiyabana gələrək müasir Azərbaycan dövlətinin memarı və qurucusu, ümummilli lider Heydər Əliyevin xatirəsini ehtiramla yad etmiş, məzarı önünə əklil qoymuşlar.
Görkəmli oftalmoloq-alim, akademik Zərifə xanım Əliyevanın da məzarı üzərinə tər güllər düzülmüşdür.
Tədbirdə çıxış edən YAP Səbail rayon təşkilatı qadınlar məclisinin sədri, professor Nübar Muxtarova ümummilli lider Heydər Əliyevin müasir Azərbaycan quruculuğundakı rolundan danışmış, ulu öndərin dövlətçilik strategiyasının həyata keçirilməsində qadınların rolu, onların ictimai-siyasi fəallığının artırılması istiqamətində görülən işlər barədə məlumat vermişdir. O, gender siyasəti, ailə və uşaqlara dövlət qayğısı, qadın siyasətinin hüquqi bazası, ulu öndərin bu istiqamətdə imzaladığı sənədlərin, qəbul edilmiş hüquqi aktların əhəmiyyəti, dahi şəxsiyyətin təşəbbüsü və təşkilatçılığı ilə hazırlanıb həyata keçirilmiş proqram və layihələrdən söz açmışdır.
Bildirilmişdir ki, ölkəmizi ağır sınaqlardan uğurla çıxarmış ulu öndərin dövlət siyasəti indi də davam edir. Əsas prioritetlərdən olan gender bərabərliyi bu gün Prezident İlham Əliyev tərəfindən uğurla davam etdirilir.
Partiyanın və qadınlar məclisinin fəal üzvləri tədbirdə çıxış edərək, dövlət səviyyəsində təhsil, elm, mədəniyyət, idman və digər sahələrə böyük diqqət və qayğının göstərildiyini vurğulamışlar. Bildirilmişdir ki, rayon əhalisinin 58 faizini təşkil edən qadınlar ictimai-siyasi həyatda fəal iştirak edirlər.
AzərTAc{nl}