Martın 9-da xarici işlər naziri Elmar Məmmədyarov iqamətgahı Ankara şəhərində yerləşən Sloveniyanın Azərbaycanda yeni təyin olunmuş səfiri Milan Yazbets ilə görüşmüşdür.
Azərbaycan Xarici İşlər Nazirliyinin mətbuat xidmətindən bildirmişlər ki, etimadnaməsinin surətini nazirə təqdim edən M.Yazbets ölkəmizdə səfir təyin olunmasından məmnunluğunu ifadə etmişdir. Səfir ölkələrimiz arasında bir sıra sahələrdə əməkdaşlığın inkişaf etdirilməsi üçün geniş potensialın olduğunu vurğulamış, yeni vəzifədə fəaliyyəti dövründə Sloveniya-Azərbaycan əlaqələrinin dərinləşməsinə çalışacağını bildirmişdir.
Nazir E.Məmmədyarov Azərbaycanda səfir təyin olunması münasibətilə sloveniyalı diplomatı təbrik etmiş və işlərində müvəffəqiyyətlər arzulamışdır.