Azərbaycanda işgüzar səfərdə olan Rusiya Federasiyası Tatarıstan Respublikasının Prezidenti Rustam Minnixanov martın 2-də Milli Məclisin sədri Oqtay Əsədovla görüşmüşdür.
Milli Məclisin sədri Oqtay Əsədov Azərbaycan ilə Rusiya Federasiyası və onun subyekti olan Tatarıstan Respublikası arasında əlaqələrin qədim tarixindən danışmış və demişdir ki, bu gün siyasi, iqtisadi, humanitar və mədəni sahələrdə münasibətlərimiz sürətlə inkişaf edir. Hökumətlərarası komissiya əməkdaşlığımızın daha da genişlənməsində xüsusi rol oynayır. İnanırıq ki, sizin bu səfəriniz əlaqələrimizin daha sürətlə inkişaf etməsinə təkan verəcəkdir.
Parlamentlərarası əlaqələrə toxunan O.Əsədov bildirmişdir ki, hələ çar Rusiyası dövründə Dövlət Dumasında mövcud olmuş müsəlman fraksiyasında azərbaycanlılar və tatarlar sıx əməkdaşlıq etmişlər.
Milli Məclisin sədri deputatlarımız arasında münasibətlərin genişləndirilməsinin, qarşılıqlı səfərlərin intensivləşdirilməsinin vacibliyini vurğulamışdır.
Rustam Minnixanov onlara göstərilən qonaqpərvərliyə görə Azərbaycan dövlətinə və xalqına minnətdarlıq etmişdir. O demişdir: "Mən ikinci dəfədir Azərbaycana gəlirəm. Ölkəniz çox sürətlə inkişaf edir, Bakı simasını dəyişmiş, daha da gözəlləşmişdir. Siz çox böyük sosial-iqtisadi proqramlar həyata keçirirsiniz. Bu məni çox sevindirir".
Tatarıstan Prezidenti Azərbaycan ilə əlaqələrin inkişafına böyük önəm verdiklərini, münasibətlərimizin bundan sonra daha da genişlənəcəyinə inamını ifadə etmişdir.
Sonra görüşdə qarşılıqlı maraq doğuran digər məsələlər ətrafında geniş fikir mübadiləsi aparılmışdır.