Bu il fevralın əvvəlində Slovakiya vətəndaşı Aşot Qriqoryan tərəfindən bir qrup slovakiyalı, çexiyalı və avstriyalı iş adamlarının Azərbaycanın işğal olunmuş ərazilərinə səfərinin təşkil edilməsi faktı ilə əlaqədar Slovakiyanın Rusiyadakı səfirliyindən Azərbaycanın bu ölkədəki səfirliyinə təkzib məktubu daxil olmuşdur.
Azərbaycan Xarici İşlər Nazirliyinin mətbuat xidmətindən bildirmişlər ki, məktubda qeyd olunan səfərin birmənalı olaraq Slovakiya vətəndaşı A. Qriqoryanın şəxsi təşəbbüsü olduğu, Yerevanda keçirilmiş mətbuat konfransında A.Qriqoryan tərəfindən səfərin rəsmi xarakter daşıması və Slovakiyanın "Eksimbank"ının Dağlıq Qarabağda layihələr maliyyələşdirəcəyi ilə bağlı fikirlərin tamamilə yanlış olduğu bildirilmişdir.
Bundan əlavə, məktubda Slovakiyanın Ermənistan-Azərbaycan, Dağlıq Qarabağ münaqişəsi ilə bağlı rəsmi mövqeyinin dəyişməz olaraq qaldığı, münaqişənin yalnız Azərbaycanın ərazi bütövlüyü, beynəlxalq hüququn norma və prinsipləri və BMT-nin müvafiq qətnamələri əsasında həll edilməsinin vacibliyi vurğulanmışdır.