Gəncə, 12 dekabr (AzərTAc). Həyatı qədər sevdiyi vətəninin bütün çətin məqamlarında ona sahib çıxan, müdrik düşüncələri, uzaqgörən siyasəti nəticəsində onu məhv olmaq təhlükəsindən qurtaran dahi şəxsiyyət - Heydər Əliyev 6 ildir ki, aramızda yoxdur. Lakin onun ideyaları bu gün də yaşayır, xatirəsi xalqımız tərəfində əziz tutulur.

Ümummilli liderimizin vəfatının 6-cı ildönümü ilə əlaqədar keçirilən anım günündə Gəncənin mərkəzi meydanı çox izdihamlı idi. Meydana toplaşan hər bir gəncəli ulu öndərə tanrıdan rəhmət diləməyi özünə borc bilirdi. Onlar döğma şəhərin inkişafında bu böyük şəxsiyyətin göstərdiyi əvəzsiz xidmətləri xatırlayır, ona minnətdarlıqlarını bildirirdilər. Memarı və qurucusu Heydər Əliyev olan müstəqil Azərbaycan dövlətinin ikinci sənaye və mədəniyyət mərkəzi olan Gəncə indi həyatının çiçəklənən dövrünü yaşayır. Ulu öndərin layiqli davamçısı Prezident İlham Əliyevin səmərəli fəaliyyəti nəticəsində iqtisadiyyatı aybaay yüksələn Gəncənin görkəmi gündən-günə dəyişir.

Bütün bu uğurlara görə ümummilli liderimiz Heydər Əliyevə minnətdar olan şəhər sakinləri anım günündə mərkəzi meydanda bir araya gələrək onun xatirəsinə dərin ehtiramlarını ifadə etmişlər. Dahi rəhbərin abidəsi önünə gül-çiçək dəstələri qoyulmuşdur.

Gəncədə anım günü Azərbaycan xalqının böyük oğluna el məhəbbətinin nümayişinə çevrilmişdir.