Koreya Xalq Demokratik Respublikası dördüncü dəfə nüvə silahı  sınağı keçirməyə hazırlaşır. Bu barədə Cənubi Koreya parlamentində dinləmələr zamanı bu ölkənin birləşmə üzrə naziri Yu Kil Çje bəyan edib. Məlumatı “Lenta ru” yayıb. 

Nazir bildirib ki, KXDR-in əsas nüvə poliqonu olan Punqeridə keçən həftə hərbçilərin və hərbi texnikanın yerdəyişməsi qeydə alınıb. Bu barədə məlumatlar Cənubi Koreya mətbuatında xüsusi xidmət orqanlarına istinadən yayılıb. Mənbələr onu da bildirmişdilər ki, Pxenyanın belə fəallıq göstərməsi Seul və Vaşinqtona təzyiq kimi də qiymətləndirilə bilər.

Bununla yanaşı, Cənubi Koreyanın kəşfiyyat orqanları KXDR-in iki orta mənzilli ballistik raketi buraxılışa hazırladığı barədə məlumatlara malik olduğunu bəyan edib. Bu raketlər hazırda ölkənin şərq sahilində yerləşdirilib və KXDR-in banisi Kim İr Senin anadan olmasının  101-ci ildönümü günü, yəni aprelin 15-də buraxıla bilər.

Paşa ƏMİRCANOV,

“Xalq qəzeti”