“Xalq qəzeti” “Euronews” agentliyinə istinadən bildirir ki, İspaniyada yüksək işsizlik səviyyəsi və hökumətin iqtisadi siyasətinə etiraz edən on minlərlə insan ölkənin 60 şəhərində yürüş keçirib. Paytaxt və digər şəhərlərdə yürüşlərin təşkilində 150-ə yaxın ictimai təşkilat və həmkarlar ittifaqları iştirak edib. Aksiyaya avtomobil sənayesi və tikinti sahəsində çalışanlar, jurnalistlər, polislər və tibb işçiləri qoşulublar. Hüquq mühafizə orqanlarının məlumatına görə, təkcə Barselonadakı mitinqdə 20 min insan iştirak edib. 

Dünən Bolqarıstanda da etiraz yürüşü olub. Belə ki, minlərlə nümayişçi küçələrə axışaraq nəqliyyatın hərəkətini iflic edib. Aksiya iştirakçıları elektrik enerjisinə qoyulan yüksək vergi, aşağı əmək haqqı və  dəmiryol şirkətlərinin özəlləşdirilməsinə qarşı etiraz ediblər. Paytaxt Sofiyada dəmiryol şirkətlərinin özəlləşdirilməsinə qarşı çıxış edənlər paytaxtın əsas küçələrindən birini bağlayıblar və şəhər merinin istefasını istəyiblər. Etirazçılar nümayişi paytaxt dəmiryol vağzalındakı relslərin üzərində davam etdiriblər. Aksiya qatarların hərkətinə mane olub.