Keniyada martın 4-də keçirilən prezident seçkilərində baş nazirin müavini, Beynəlxalq Cinayət Məhkəməsi tərəfindən bəşəriyyət əleyhinə cinayətlərdə ittiham olunan Uxuru Keniyatta qalib gəlmişdir.

APA-nın “Reuters”ə istinadən xəbərinə görə, Keniya Mərkəzi Seçki Komissiyası bütün büllütenlərin sayılmasından sonra U.Keniyattanın 50,03 faiz səs topladığını və birinci turda qalib gəldiyini açıqlamışdır.

Onun əsas rəqibi olan Baş nazir Rayl Odinqinin qərargahından bildirilmişdir ki, seçkilərin nəticələri ilə bağlı məhkəməyə müraciət edəcəklər.

Qeyd edək ki, U.Keniyatta 2007-ci il seçkilərindən sonra kütləvi iğtişaşların təşkilində və 1200 nəfərin ölümünə səbəb olmaqda ittiham edilir. Beynəlxalq Cinayət Məhkəməsinin baş prokuroru Luis Moreno Okampo ehtimal edir ki, iğtişaşlar zamanı U.Keniyatta “Munqiki” dini-siyasi hərəkatının ekstremistlərinə rəhbərlik etmişdir.