Xalqın vətənpərvər ziyalıları radikalların gənclərin şüurunu korlamağa yol verməzlər

Azərbaycanın dini tolerantlıq məkanı kimi bütün dünyada tanındığı, multikultural dəyərlərin yüksək səviyyədə qəbul edildiyi bir zamanda antiazərbaycan təbliğatının aparılması heyrət doğurur. Son günlər din pərdəsi altında sosial şəbəkələrdə fəallaşan dini radikal qruplar ölkəmizin iqtisadi, siyasi, mədəni nüfuzuna qara yaxmaqla məşğuldurlar. İslam Demokrat Partiyasının sədri Tahir Abbaslının bu qarayaxma kampaniyası ilə bağlı fikirlərini öyrəndik. O dedi:
 
– İslam dini yarandığı dövrdən bəri hər bir insanın kamilləşməsinə, ictimailəşməsinə, şəxsiyyət kimi formalaşmasına yardımçı olub, istiqamət verib. Hələ Səfəvillər dövründə, dövlətimiz təhlükədə olan zaman ayrı-ayrı məzhəb və təriqətlər birləşərək, dövlətçiliyin təməl prinsiplərini qoruyub saxlamışlar. Bütün zamanlarda güclü dövlətlər müsəlman ölkələrini təsir altında saxlamaq üçün hər çür vasitələrdən, həmçinin dinimizdən də istifadə etməyə çalışmışlar.
 Bu gün də cəmiyyətimizə, dövlətimizə, onun milli-mənəvi və dini dəyərlərinə ağır zərbələr vurmaq istəyənlər var. Əfsuslar olsun ki, belə kampaniyaları dəstəkləyənlər, ona kömək edənlər xarici ölkələrdə oturub ölkəmizdəki sabitliyə əl uzadaraq istədiklərinə nail ola biləcəklərini düşünürlər. Onlar unudurlar ki, ənənəvi məzhəblər və təriqətlər milli kimliyə və dövlətçiliyə heç vaxt xəyanət etməmişlər. Lakin buna baxmayaraq, Azərbaycandakı sabitliyi pozmağa maraqlı olan dairələr sosial şəbəkələrdə din pərdəsi altında antiazərbaycan təbliğatı aparmağa cəhd edir, müxtəlif çağırışlar, videomüraciətlər yayırlar. Guya ölkəmizdə insan hüquqları pozulur, din xadimləri sıxışdırılır. Təbii ki, bütün bunlar absurddur və heç bir fakta əsaslanmır, məntiqə sığmır. Bu cür dezinformasiyaları yaymaqda məqsəd ölkəmizdəki daxili sabitliyi pozmağa cəhd etmək, insanların dini inanclarını istismar etməklə, öz çirkin niyyətlərini həyata keçirməkdir. 
 Xaricdə oturub ölkəmizdəki imanlı insanları tora salmağı, hakimiyyətə qarşı çevirməyi özlərinin başlıca vəzifəsi hesab edən siyasi dəllallar din pərdəsi adı altında aranı qarışdırmağa təşəbbüs göstərirlər. Amma onlar unudurlar ki, ölkəmizdə ayıq və savadlı dindarlar ordusu var. Onlar heç zaman belə nankorların dini şüurumuzu korlamasına yol verməzlər. Dində yanlışlıq yarandısa, deməli, o, artıq din deyildir. Hər kim yanlış təfəkkürü dinlə bağlamağa cəhd etsə, çox çəkməz, ifşa olunar. Varisi olduğumuz Vətən, millət və dövlət milyonlarla insanın qanı və düşüncəsi hesabına var olub. Saf niyyətli, sağlam əqidəli dindarlar ordusu həmişə müqəddəs bildiyimiz milli ideologiyamıza sahib duranların yanında olub. Bu addımı vətənpərvərlik rəmzi kimi dəyərləndirərək deyə bilərəm ki, biz, xalqın vətənpərvər ziyalıları, dindarlar radikal dağıdıcı ünsürlərin gənclərin dini şüurunu korlamasına yol vermərik.
Hazırladı:
Zərifə BƏŞİRQIZI, 
“Xalq qəzeti”

© İstifadə edilərkən "Xalq qəzeti"nə istinad olunmalıdır.



  • I Avropa Oyunlarının təəssüratları uzun müddət xatirələrdə yaşayacaq

    I Avropa Oyunlarının təəssüratları uzun müddət xatirələrdə yaşayacaq

  • Hər gün bir tarix, hər gün bir zəfər

    Hər gün bir tarix, hər gün bir zəfər

  • Birinci Avropa Oyunları məşəlinin Bakının mədəniyyət və incəsənət mərkəzlərinə səyahəti

    Birinci Avropa Oyunları məşəlinin Bakının mədəniyyət və incəsənət mərkəzlərinə səyahəti

  • “Bakı – 2015”-in məşəli bölgələrə səyahətin son günündə bəşəriyyətin keçmişinə işıq salıb paytaxta qayıdır

    “Bakı – 2015”-in məşəli bölgələrə səyahətin son günündə bəşəriyyətin keçmişinə işıq salıb paytaxta qayıdır

  • Siyəzən birinci Avropa Oyunlarının məşəl estafetini qəbul etdi

    Siyəzən birinci Avropa Oyunlarının məşəl estafetini qəbul etdi

Çox oxunanlar



Təqvim

Hava haqqında