Hər bir xalqın  milli varlığını şərtləndirən əsas amillərdən biri onun dilidir. Əsrlərcə yaşadılmış  Azərbaycan dili bu baxımdan çox əhəmiyyətlidir. Bu fikirlər

iyunun 31-də 1 avqust - Azərbaycan əlifbası və Azərbaycan dili günü münasibətilə Dini Qurumlarla İş üzrə Dövlət Komitəsinin tabeliyində yaradılmış Mənəvi Dəyərlərin Təbliği Fondunun təşkilatçılığı ilə “Dilim varsa, mən varam” mövzusunda keçirilmiş tədbirdə səsləndirilib. Tədbiri giriş sözü ilə açan Fondun icraçı direktoru Mehman İsmayılov mövzunun əhəmiyyəti barədə danışıb. O qeyd edib ki, tədbir milli mənəvi dəyərlərimizin əsas dayaqlarından biri olan dilimizin saflığının qorunması, qloballaşma nəticəsində dilimizin qarşılaşdığı problemlərin təhlili, müasir dünya dilləri arasında dilimizin yeri, inkişaf mərhələləri və bu kimi mövzuların müzakirəsi aparılması baxımından olduqca əhəmiyyətlidir.

Mənəvi Dəyərlərin Təbliği Fondunun Himayəçilər Şurasının üzvü, “Səs” Media Qrupunun rəhbəri Bəhruz Quliyev vurğulayıb ki, ulu öndər  Heydər Əliyev Azərbaycan dilinin inkişafına xüsusi diqqət yetirib. Ümummilli lider  bütün sahələrdə olduğu kimi, dilimizin inkişafında da müstəsna xidmətlər göstərib. Onun 1 avqust - Azərbaycan əlifbası və Azərbaycan dili günü ilə bağlı imzaladığı sərəncam bunun bariz nümunəsidir.

Tədbirdə Nəsimi adına Dilçilik İnstitutunun elmi işlər üzrə direktor müavini, filologiya üzrə fəlsəfə doktoru Baba Məhərrəmlinin “Qloballaşma dövründə Dilimizin saflığının qorunması məsələsi”, AMEA-nın Fəlsəfə İnstitutunun şöbə müdiri Afaq Rüstəmovanın “Dil və siyasət: qarşılıqlı əlaqə məsələləri”, Bakı Beynəlxalq Multikulturalizm Mərkəzinin analitika şöbəsinin müdiri Rəşad İlyasovun “Çoxdillilik və multikulturalizm”, AMEA-nın akademik Z.M. Bünyadov adına Şərqşünaslıq İnstitutunun din və ictimai fikir tarixi şöbəsinin elmi işçisi Elvüsal Məmmədovun “Dini ədəbiyyatın tərcüməsi: mövcud vəziyyət və problemlər” mövzularında məruzələri dinlənilib.

Əfsanə BAYRAMQIZI,

“Xalq qəzeti”