Aparılacaq təmir işləri ilə əlaqədar olaraq Bakı-Sumqayıt yolunun Xırdalan dairəsinin altından keçən tunelində (Sumqayıt istiqamətində) iyulun 31-dən avqustun 1-nə keçən gecə hərəkət məhdudlaşdırılır. Bu barədə “Azərbaycan Avtomobil Yolları” Dövlət Agentliyinin  İctimaiyyətlə əlaqələr şöbəsi məlumat verib.

Məlumata görə, hərəkətin məhdudlaşdırılması bir-neçə saatlıq, daha dəqiqi gecə saat 00:00-dən səhər saat 05:00-ə kimi tətbiq ediləcək.

Qeyd olunan saatlar ərzində hərəkət tunelin yan yoluna, dairə istiqamətinə yönəldiləcək.

“Yaranan müvəqqəti narahatlığa görə “Azərbaycan Avtomobil Yolları” Dövlət Agentliyi vətəndaşlardan üzr istəyir və aparılan işlərə anlayışla yanaşmalarını xahiş edir.”—deyə Agentlik müraciətində bildirir.

Əfsanə BAYRAMQIZI,
“Xalq qəzeti”