Moskvaya səfəri çərçivəsində Müdafiə naziri general-polkovnik Zakir Həsənov Alabino poliqonundakı “Dostluq Evi”nə baş çəkib. O, “Beynəlxalq Ordu Oyunları - 2018” yarışlarının iştirakçı ölkələrinin nümayiş etdirilən mədəniyyət nümunələri ilə tanış olub. Bu barədə Azərbaycan Respublikası Müdafiə Nazirliyinin rəsmi saytı məlumat yayıb.

Müdafiə naziri digər qonaqlarla birgə sərginin Azərbaycan bölməsində ölkəmizin tarixi, mədəniyyəti, adət-ənənələri, məişətinə aid ekspozisiyalarla tanış olub.

Müdafiə naziri “Səhra mətbəxi” müsabiqəsində iştirak edən hərbçilərimizlə də görüşüb. Çoxsaylı qonaqlar Azərbaycanın hərbi aşpazlarının hazırladıqları təamların dadına baxıblar.  Azərbaycan komandası da daxil olmaqla, müxtəlif ölkələrin hərbi aşpazları yarışların iştirakçıları və qonaqlar üçün 150-dən çox milli mətbəx nümunələri təqdim ediblər.

Tədbirdə həmçinin ölkəmizin Rusiya Federasiyasındakı fövqəladə və səlahiyyətli səfiri Polad Bülbüloğlu və digər rəsmi şəxslər iştirak edib.

Əfsanə BAYRAMQIZI,
“Xalq qəzeti”