Rusiya Prezidenti Vladimir Putin və ABŞ Prezidenti Donald Tramp 2019-cu ildə görüşəcəklər. “Bloomberg” agentliyi xəbər verir ki, bu haqda ABŞ Prezidentinin milli təhlükəsizlik məsələləri üzrə məsləhətçisi Con Bolton bildirib.

Qeyd edilir ki, liderlərin görüşü “Rusiyanın müdaxiləsi” üzrə araşdırmanın tamamlanmasından sonra keçiriləcək.

Qeyd edək ki, Rusiyanın ABŞ-dakı seçkilərə mümkün müdaxiləsi və prezident Trampın Rusiya ilə güman edilən əlaqələr müstəqil xüsusi prokuror Robert Müller, həmçinin ABŞ Konqresinin kəşfiyyat üzrə komitələri və Nümayəndələr Palatası tərəfindən araşdırılır.

Moskva isə ABŞ-dakı seçkilərə mümkün müdaxilə və prezident Trampın Rusiya ilə güman edilən əlaqələri barədə ittihamları əsassız hesab edir.

Xatırladaq ki, Rusiya və ABŞ prezidentləri arasında ilk tam formatlı görüş iyulun 16-da Helsinkidə keçirilib.

Elçin ABBASOV,
“Xalq qəzeti”