Demoqrafiya və əhali sakinliyi sahəsində BMT-nin Əhali Fondu ilə əməkdaşlığın gələcək istiqamətləri nəzərdən keçirilib

BMT-nin Əhali Fondunun və Çexiyanın Karlov Universitetinin ekspertləri ilə birgə Əmək və Əhalinin Sosial Müdafiəsi Nazirliyi (ƏƏSMN) tərəfindən ilk dəfə olaraq respublikanın iqtisadi rayonları və Bakı şəhəri üzrə əhali proqnozları hazırlanıb. Cari ildə bu proqnozların korrektirovkasının aparılması, nəticələr üzrə məlumat bazasının yaradılması və proqnoz məlumatlarının dərc olunması nəzərdə tutulur.
 
Nazirliyin ictimaiyyətlə əlaqələr şöbəsindən AZƏRTAC-a bildirilib ki, bu sözləri əmək və əhalinin sosial müdafiəsi naziri Sahil Babayev BMT-nin Əhali Fondunun Azərbaycandakı nümayəndəliyinin baş müşaviri Fərid Babayevlə görüşdə deyib.
S.Babayev Azərbaycan Respublikasının Prezidenti İlham Əliyevin sosial-iqtisadi inkişaf strategiyasının nailiyyətlərindən biri kimi ölkəmizdə demoqrafiya və əhali sakinliyi sahəsində müsbət vəziyyətin mövcud olduğunu diqqətə çatdırıb. O, bu sahədə ölkəmizdə təkmil əsaslara söykənən siyasətin hazırlanması və həyata keçirilməsində BMT-nin Əhali Fondu ilə ardıcıl və səmərəli əməkdaşlığın formalaşdığını qeyd edib. Nazir xüsusilə “Azərbaycan Respublikasında əhali sakinliyi və demoqrafik inkişaf sahəsində Dövlət Proqramının (2018-2030-cu illər)” layihəsinin hazırlanmasında, demoqrafik vəziyyətin qiymətləndirilməsi və dolğun proqnozlar sisteminin yaradılmasında bu əməkdaşlığın əhəmiyyətini xüsusi vurğulayıb.
Nazir beynəlxalq ekspertlər cəlb olunmaqla ölkənin inkişafına təsir edən demoqrafik və sosial-iqtisadi amillərin qarşılıqlı əlaqələrinin öyrənilməsi üzrə kompleks tədqiqatların aparılmasının vacib olduğunu bildirib. S.Babayev bu il “Dayanıqlı İnkişafın təmin olunması üçün əhali haqqında demoqrafik göstəricilərin düzgün interpretasiyası və tətbiqi” mövzusunda ölkəmizdə təşkil olunacaq seminarda Karlov Universitetinin və Moskva Dövlət Universitetinin demoqrafiya üzrə ekspertlərinin cəlb olunmasına Fond tərəfindən dəstək verilməsinin məqsədəuyğun ola biləcəyini qeyd edib.
Nazir Fondun demoqrafiya və əhali sakinliyi sahəsində ƏƏSMN ilə əməkdaşlığı genişləndirməkdə, birgə fəaliyyətin, o cümlədən əhali proqnozlarının hazırlanması üzrə işlərin davam etdirilməsində maraqlı olduğunu diqqətə çatdırıb.
Görüşdə əhali sakinliyi və demoqrafik inkişaf sahəsində yeni dövlət proqramının layihəsindən bəhs olunub, dövri olaraq ölkəmizdə demoqrafik proqnozların hazırlanması üçün mükəmməl proqnozlaşdırma metodologiyasının yaradılmasının əhəmiyyəti vurğulanıb. Beynəlxalq ekspertlərlə birgə demoqrafik və sosial-iqtisadi amillərin qarşılıqlı əlaqələrinin öyrənilməsi, mövcud demoqrafik vəziyyətin qiymətləndirilməsi və perspektiv inkişaf meyillərinin müəyyənləşdirilməsi üçün kompleks tədqiqatların aparılması müzakirə olunub.
Əhalinin yaş-cins strukturunda baş verən dəyişikliklərin makroiqtisadi inkişafa təsirlərinin araşdırılması məqsədilə “Milli Transfer Hesabları” layihəsinin tətbiqi, əhali sakinliyi və demoqrafiya sahəsində kadr potensialının inkişaf etdirilməsi və s. məsələlərə dair fikir mübadiləsi də aparılıb, əməkdaşlığın gələcək istiqamətləri nəzərdən keçirilib.

© İstifadə edilərkən "Xalq qəzeti"nə istinad olunmalıdır.



  • I Avropa Oyunlarının təəssüratları uzun müddət xatirələrdə yaşayacaq

    I Avropa Oyunlarının təəssüratları uzun müddət xatirələrdə yaşayacaq

  • Hər gün bir tarix, hər gün bir zəfər

    Hər gün bir tarix, hər gün bir zəfər

  • Birinci Avropa Oyunları məşəlinin Bakının mədəniyyət və incəsənət mərkəzlərinə səyahəti

    Birinci Avropa Oyunları məşəlinin Bakının mədəniyyət və incəsənət mərkəzlərinə səyahəti

  • “Bakı – 2015”-in məşəli bölgələrə səyahətin son günündə bəşəriyyətin keçmişinə işıq salıb paytaxta qayıdır

    “Bakı – 2015”-in məşəli bölgələrə səyahətin son günündə bəşəriyyətin keçmişinə işıq salıb paytaxta qayıdır

  • Siyəzən birinci Avropa Oyunlarının məşəl estafetini qəbul etdi

    Siyəzən birinci Avropa Oyunlarının məşəl estafetini qəbul etdi

Çox oxunanlar



Təqvim

Hava haqqında