Son zamanlar elektrik mühərriki ilə çalışan yeni nəsil avtomobillərlə daim gündəmə gələn “Tesla” şirkəti haker hücumuna məruz qalıb. Bu barədə “Webtekno.сom” saytı xəbər verib.

 

Məlumata görə, hakerlər “Tesla”nın “Level One” adlı şirkətlə əlaqələrindən istifadə edərək Amerika kompaniyasına hücum təşkil ediblər. Kiberhücum nəticəsində şirkətə məxsus bütün məlumatların ələ keçirildiyi bildirilir. Oğurlanmış informasiyalara sürücü lisenziyası və pasport məlumatları, bank məlumatları kimi 41 mindən çox sənəd daxildir. 

Qeyd edək ki, 157 GB həcmində məlumatın oğurlandığı haker hücumunun qurbanı təkcə “Tesla” şirkəti deyil. “Toyota”, “Fiat” və “Volkswagen” kimi nəhəng avtomobil şirkətlərinin də gizli məlumatları ələ keçirilib.

Əfsanə ƏHƏDLİ,

“Xalq qəzeti”