İyulun 20-də Yeni Azərbaycan Partiyasının (YAP) qərargahında 22 iyul - Milli Mətbuat Günü ilə əlaqədar jurnalistlərlə görüş keçirilib.

 

görüşdə Baş nazirin müavini, YAP-ın sədr müavini-icra katibi Əli Əhmədov Azərbaycanda hər il Milli Mətbuat Gününün yüksək səviyyədə qeyd olunduğunu söyləyib. O vurğulayıb ki, Azərbaycan sürətlə inkişaf edir və bu, özünü söz və mətbuat azadlığı sahəsində də göstərir. Müasir cəmiyyətimizi söz və mətbuat azadlığı olmadan təsəvvür etmək mümkün deyil. Azərbaycanda dövlət səviyyəsində mətbuata mühüm önəm verilir, mətbuatın inkişafına dəstək göstərilir. Prezident İlham Əliyevin bu günlərdə imzaladığı Sərəncamla mətbuat orqanlarına maliyyə dəstəyi ayrıldı. Jurnalistlər üçün yaşayış binalarının tikilib istifadəyə verilməsi də dövlətimizin bu sahəyə qayğısının göstəricisidir. Bunlar dövlətimizin başçısının kütləvi informasiya vasitələrinə diqqət və qayğısının ifadəsidir. Beləliklə, ölkəmizdə güclü mətbuat mövcuddur və jurnalistlər ordusu formalaşıb. Mətbuat orqanlarının mütləq əksəriyyəti milli maraqların keşiyində dayanır. 

Əli Əhmədov qeyd edib ki, Yeni Azərbaycan Partiyası ənənəvi olaraq Milli Mətbuat Gününü qeyd edir. Bu, həm cəmiyyətin mətbuata önəminin, həm də partiyamızın mətbuatın roluna böyük əhəmiyyət verməsinin göstəricisidir.

Sonda tədbirdə iştirak edən jurnalistlərə Milli Mətbuat Günü münasibətilə mükafatlar təqdim olunub.

AZƏRTAC