ABŞ Dövlət Departamentinin rəsmisi Natan Seyls deyib ki, Birləşmiş Ştatlar hökuməti İŞİD, “əl-Qaidə”, İranyönlü terror qruplaşmaları və PKK-ya qarşı mübarizədə öz müttəfiqlərini bundan sonra da dəstəkləmək əzmindədir. ABŞ hökumətinin yetkilisi bu fikri Vaşinqtondakı Marşal-Almaniya Fondunda çıxışı zamanı səsləndirib. Bu barədə “Anadolu” agentliyi məlumat yayıb. 

 

N.Seyls bildirib ki, Vaşinqton öz müttəfiqlərini təkcə İŞİD və “əl-Qaidə” yaraqlılarına qarşı deyil, eləcə də İranyönlü terror qruplaşmalarına və PKK-ya qarşı sərt mövqe tutmağa çağırır. Dövlət Departamentinin nümayəndəsi sonra qeyd edib ki, PKK qruplaşması ABŞ hökuməti tərəfindən terror təşkilatları siyahısına hələ ­1997-ci ildə daxil edilib. Onun sözlərinə görə, PKK-ya münasibətdə ABŞ-ın mövqeyi bəllidir: “Biz PKK-nı terror təşkilatı elan etmişik. PKK “Hizbullah” və HƏMAS-la birlikdə terror təşkilatları siyahısına salınıb. PKK-ya məhz bu meyarlardan yanaşırıq”. 

N.Seyls məlumat verib ki, ABŞ hökuməti hazırda PKK-nın maliyyələşdirilməsinə qarşı müvafiq addımlar atmayan ölkələrlə danışıqlar aparır. Məqsəd bu mövqeyin dəyişdirilməsidir. N.Seyls deyib: “Sirr deyil ki, dünyanın bir sıra regionlarında PKK üçün vəsait toplanır. ABŞ bunun əleyhinə mübarizə aparır. Biz öz müttəfiqlərimizi analoji addımlar atmağa səsləyirik”. 

Məsaim ABDULLAYEV, 

“Xalq qəzeti”