“Türkiyənin yaxın gələcəkdə enerji siyasətinin prioritetləri bunlardır: ölkədə maliyyə və siyasi sabitliyi gücləndirmək, sahibkarlığı daha da inkişaf etdirmək”. Bu sözləri “Anadolu” agentliyinə müsahibəsi zamanı enerji və təbii resurslar naziri Fateh Dönməz bildirib.

 

Bununla bərabər, ­nazir qeyd edib ki, şəraitdən və qlobal reallıqlardan asılı olaraq, prioritetlərin sayı arta bilər. F.Dönməz həmçinin bildirib ki, Türkiyənin yeni idarəetmə üsuluna keçməsi ilə əlaqədər bir sıra nazirliklərdə, o cümlədən Enerji və Təbii Resurslar Nazirliyində struktur islahatları başlayıb. Bu qurumlarda hazırda bir sıra paralel şöbə və idarələr ləğv edilir, yaxud birləşdirilir. Türkiyəli nazir konkret misal çəkib. Məsələn, nazirliyin nəzdindəki bərpaolunan enerji mənbələri şöbəsi enerji problemləri şöbəsi ilə birləşdirilib. Nazir vurğulayıb ki, faydalı qazıntılar və karbohidrogenlər sahəsində fəaliyyət göstərən şirkətlər hökumətdən güzəştli şərtlərlə kredit ala biləcəklər. Yeri gəlmişkən, adları çəkilən sahələr bundan sonra dağ-mədən və neft sənayesi şöbəsində birləşəcəklər.

Dönməz sonda bildirib ki, yeni hökumətin enerji sahəsində əsas vəzifələrindən biri də uğurlu investisiya siyasəti aparmaqdır: “Bizim üçün olduqca vacibdir ki, yerli və xarici sərmayədarlar Türkiyə iqtisadiyyatına inansınlar və ölkəmizin sənayesinə vəsait qoysunlar”.

 

Məsaim ABDULLAYEV,

“Xalq qəzeti”