Türkiyə hökuməti ən qısa zamanda inflyasiyanı birrəqəmli göstəriciyə qədər aşağı salmaq, sonrakı mərhələdə isə bu prosesi planlı şəkildə nizamlamaq niyyətindədir. Bu fikri “Anadolu” agentliyinə müsahibəsi zamanı yeni hökumətin iqtisadi sahədə planlarını şərh edərkən xəzinədarlıq və maliyyə naziri Berat Albayrak səsləndirib. 

 

Onun sözlərinə görə, Xəzinədarlıq və Maliyyə Nazirliyinin əsas vəzifələri büdcə müəssisələrinin maliyyə intizamına əməl etmələrinə nəzarətin gücləndirilməsi, inflyasiyanın aşağı salınması  və struktur islahatlarının aparılmasıdır. B.Albayrak deyib: “Qarşıya Türkiyənin sabit və davamlı inkişaf etdirilməsi vəzifəsi qoyulub. Ankara qlobal bazarın bütün subyektəri ilə sıx əməkdaşlığa hazırdır”.  

Nazir vurğulayıb ki, əsas səylər Türkiyəyə xaricdən isvestisiya axının gücləndirilməsinə və şaxələndirilməsinə istiqamətləndiriləcək. Onun sözlərinə görə, Türkiyənin yeni ortamüddətli iqtisadi inkişaf proqramı qlobal bazarın bütün iştirakçıları üçün cəlbedicidir.  

B. Albayrak ölkədə qiymətlərin tənzimlənməsində və səmərəli pul-kredit siyasətinin aparılmasında Türkiyə Mərkəzi Bankının mühüm rol oynadığını diqqətə çadıraraq deyib ki, bank bundan sonra, ilk növbədə, iqtisadi reallıqlar və bazar şərtlərinə uyğun olaraq müstəqil struktur kimi fəaliyyət göstərəcək. Məqsəd bu qurumun fəaliyyətində maksimum səmərəliliyə nail olmaqdır.  

Bu arada Beynəlxalq Valyuta Fondu Türkiyənin “yeni hökumətinin sağlam iqtisadi siyasət həyata keçirmək” planlarını yüksək qiymətləndirib. Fondun nümayəndəsi Cerri Rays Vaşinqtonda “Anadolu” müxbirinə deyib ki, yeni hökumətin ölkədə makroiqtisadi sabitliyi gücləndirməyə və sektorlararası tənasübün yaradılmasına çalışması düzgün addımdır. 

Məsaim ABDULLAYEV,

“Xalq qəzeti”