Azərbaycanın Milli bayramı - Respublika Günü münasibətilə icazə verin, Çin Xalq Respublikasının Hökuməti və xalqı adından, şəxsən öz adımdan Zati-alinizə və Sizin şəxsinizdə dost Azərbaycan xalqına səmimi təbriklərimi və ən xoş arzularımı çatdırım.
Son illərdə Zati-alinizin rəhbərliyi ilə Azərbaycanda siyasi sabitlik qorunub saxlanılır, iqtisadiyyat sürətlə inkişaf edir, xalqın həyat səviyyəsi xeyli yüksəlir, dövlətin qüdrəti artır. Dostluğa əsaslanan əməkdaşlığın tərəfdaşları kimi, biz buna sevinir və Azərbaycana ölkənin quruculuğu işində səmimi qəlbdən böyük uğurlar arzulayırıq.
Çin ilə Azərbaycan arasında diplomatik münasibətlər yaradılandan sonrakı 19 ildə bu münasibətlər sağlam və sabit inkişaf etmişdir. Qarşılıqlı siyasi etimad dərinləşir, ticari-iqtisadi əməkdaşlıq sürətlə inkişaf edir, mədəni əlaqələr və mübadilələr mütəmadi genişlənir. Biz yaxşı əlaqə saxlayır və beynəlxalq məsələlərdə bir-birimizi dəstəkləyirik. Uzunmüddətli və sabit Çin-Azərbaycan dostluq münasibətlərinin inkişafı ölkələrimizin və xalqlarımızın əsas mənafelərinə uyğundur. Çin tərəfi Azərbaycan tərəfi ilə birlikdə qarşılıqlı siyasi etimadımızı mütəmadi möhkəmlətməyə, işgüzar əməkdaşlığı genişləndirməyə, humanitar əlaqələri fəallaşdırmağa, dostluq və tərəfdaşlıq münasibətlərimizi yeni səviyyəyə çatdırmağa hazırdır.
Sizin ölkənizə firavanlıq və qüdrət, xalqınıza əmin-amanlıq və xoşbəxtlik diləyirəm!
Zati-alinizə möhkəm cansağlığı diləyir, ən xoş arzularımı bildirirəm!
{nl}
Dərin hörmətlə,
Hu TSZİNTAO Çin Xalq Respublikasının sədri
{nl}
Hörmətli cənab Prezident!
Azərbaycan Respublikasının Milli bayramı Sizə ən səmimi təbriklərimi, Azərbaycan xalqına sülh və tərəqqi arzularımı çatdırmaq üçün mənə gözəl fürsət verir.
Bu yaxınlarda Bakıya rəsmi səfərim ölkələrimiz arasında strateji tərəfdaşlıq mərhələsinə çatmış ikitərəfli münasibətlərin yüksək səviyyədə olduğunu bir daha açıq şəkildə təsdiq etdi. Bu mənada səfər çərçivəsində strateji tərəfdaşlığın yerinə yetirilməsi üçün imzalanmış Birgə Fəaliyyət Planı razılaşdırılmış əməkdaşlıq istiqamətlərinin həyata keçirilməsinə yönəlmiş real yol xəritəsidir.
Fürsətdən istifadə edərək Rumıniya ilə Azərbaycan Respublikası arasında enerji əməkdaşlığını, xüsusilə də Avropa İttifaqının enerji təhlükəsizliyi üçün strateji əhəmiyyət daşıyan "Nabucco" və AGRİ regional layihələrini dəstəkləməyinizi alqışlayıram.
Sizin Buxarestə növbəti səfəriniz zamanı baş tutacaq görüşümüzə ümidvar olaraq, hörmətli cənab Prezident, mənim ən böyük ehtiramımı qəbul etməyinizi xahiş edirəm.
{nl}
Trayan BESESKU Rumıniyanın Prezidenti
{nl}
Zati-aliləri!
Milli bayramınız - Respublika Günü münasibətilə Sizə və Azərbaycan xalqına kanadalılar adından təbriklərimi çatdırmaqdan məmnunluq duyuram.
Azərbaycan və Kanada əksər beynəlxalq təşkilatların üzvü olaraq bir çox məsələlər üzrə əməkdaşlıq edirlər. Kanada son illər ərzində Azərbaycan iqtisadiyyatının inkişafını müşahidə edir və hesab edir ki, bu, ölkənizin sosial, iqtisadi və siyasi inkişafına imkan yaradır.
Bu əlamətdar günün qeyd olunması münasibətilə Sizə və Azərbaycan xalqına cansağlığı, xoşbəxtlik və rifah arzu edirəm.
{nl}
Hörmətlə,
Devid CONSTON Kanadanın General-qubernatoru
{nl}
Zati-aliləri!
Azərbaycan Respublikasının Milli bayramı 28 May - Respublika Günü münasibətilə Sizə ən səmimi təbriklərimi çatdırır, ölkənizə tərəqqi və sülh arzu edirəm.
Latviya ilə Azərbaycan arasında həqiqi dostluq, eyni zamanda, konstruktiv əlaqələrin mövcudluğunu qeyd etmək olduqca xoşdur. Əmin olduğumu bildirirəm ki, hazırda çox sıx olan əməkdaşlığımızın bundan sonrakı inkişafı ölkələrimizin uzunmüddətli maraqlarına xidmət edəcək və yaxın illərdə də buna şərait yaradacağıq.
Zati-aliləri, icazə verin, Azərbaycan xalqına ən xoş arzularla əmin-amanlıq diləyim, Sizə ən yüksək hörmət və ehtiramımı bildirim.
Hörmətlə Sizin,
{nl}
Valdis ZATLERS Latviya Respublikasının Prezidenti
{nl}
Dost ölkənizin Milli bayramı - Respublika Gününü qeyd etdiyi bir vaxtda Sizi səmimi qəlbdən təbrik etməkdən böyük məmnunluq hissləri keçirirəm. Fürsətdən istifadə edərək ölkələrimiz və xalqlarımız arasındakı dostluq əlaqələrinin daha da inkişaf etdirilməsini arzulayıram.
Zati-alinizə möhkəm cansağlığı və səadət, ölkənizə, onun dost xalqına tərəqqi və firavanlıq arzulayıram.
Sizə dərin ehtiram bəslədiyimə əmin ola bilərsiniz.
{nl}
Sabah Əl-Əhməd Əl-Cabir Əs-Sabah Küveyt Dövlətinin Əmiri
{nl}
Zati-aliləri!
Azərbaycan Respublikasının yaradılması gününün qeyd olunması münasibətilə Zati-alinizə və Sizin şəxsinizdə dost Azərbaycan xalqına Laos xalqı adından və öz adımdan ən səmimi təbriklərimi və ən xoş arzularımı çatdırıram.
Mən inanıram ki, Laos Xalq Demokratik Respublikası və Azərbaycan Respublikası arasında mövcud olan ənənəvi dostluq və əməkdaşlıq əlaqələri gələcəkdə də xalqlarımızın mənafeyi, dünyada sülhün və əməkdaşlığın inkişafı naminə genişləndiriləcəkdir.
Zati-aliləri, ən yüksək hörmət və ehtiramımı qəbul etməyinizi xahiş edirəm.
{nl}
Çoummali SAYASONE Laos Xalq Demokratik Respublikasının Prezidenti
{nl}
Azərbaycanın Milli bayramı - Respublika Günü münasibətilə bizim dövlətin adından və şəxsən öz adımdan Sizə və Azərbaycan xalqına ən səmimi təbriklərimi çatdırıram. Fərəhlə qeyd edirik ki, son illərdə Azərbaycan Respublikası sosial-iqtisadi inkişaf və siyasi sabitliyin qorunub saxlanması işində böyük uğurlar qazanmışdır.
Vyetnam ilə Azərbaycan arasında ənənəvi dostluq və əməkdaşlıq münasibətlərinin yenidən inkişaf etməsindən məmnunam. Əminəm ki, iki ölkənin ali rəhbərliyinin ciddi diqqəti, nazirlik və idarələrin fəal əlaqələndirmə işi sayəsində Vyetnam ilə Azərbaycan arasında əməkdaşlıq hər iki xalqın mənafeyi naminə bundan sonra da inkişaf edəcək, regionda və bütün dünyada sülhün, sabitliyin və əməkdaşlığın qorunub saxlanmasına kömək edəcəkdir.
Qardaş Azərbaycan Respublikasının bu təntənəli bayramı münasibətilə Azərbaycan xalqına xoşbəxtlik və firavanlıq diləyirəm.
Sizə, cənab Prezident, möhkəm cansağlığı, xoşbəxtlik və ali dövləti vəzifənizdə böyük uğurlar diləyirəm.
{nl}
Nquen Min ÇİYET Vyetnam Sosialist Respublikasının Prezidenti
{nl}
© İstifadə edilərkən "Xalq qəzeti"nə istinad olunmalıdır.
