Lənkəran Dövlət Universitetində  şəhər Gənclər və İdman İdarəsi ilə birgə Xocalı faciəsinin 22-ci ildönümünə həsr edilmiş tədbir keçirilmişdir. Tədbiri universitetin humanitar və pedaqoji elmlər fakültəsinin dekanı, filologiya üzrə fəlsəfə doktoru Kamran Kazımov açmış, günahsız qurbanların xatirəsi bir dəqiqəlik sükutla yad edilmişdir.

Lənkəran Şəhər Gənclər və İdman İdarəsi rəisinin müavini Nazim Vəliyev erməni millətçilərinin Azərbaycana qarşı əsassız torpaq iddialarından, ölkə Prezidenti İlham Əliyevin dövlətçiliyimiz naminə apardığı haqq işindən danışmışdır.

Universitetin tələbə-gənclər təşkilatının sədri Ülvi Miriyev, üçüncü kurs tələbəsi Aynur Tağıyeva və başqaları çıxış edərək  bildirmişlər ki, təkcə Azərbaycanın deyil, eləcə də bəşəriyyətin faciəsi olan Xocalı soyqırımı insanlığa qarşı yönəldilmiş ağır cinayət hadisəsi, əsl soyqırımıdır. Qeyd olunmuşdur ki, Lənkəran Dövlət Universitetinin kollektivi “Azərbaycan həqiqətlərini dünyaya çatdıraq!” hərəkatına qoşulmuş, bununla əlaqədar universitetdə keçirilmiş kütləvi aksiyada min nəfərdən çox tələbə iştirak etmişdir. Universitetin vebsaytında “Azərbaycan həqiqətləri!” adlı səhifə açılmışdır. Eyni zamanda, bu günlərdə universitetin elmi kitabxanasında Xocalı soyqırımına həsr edilmiş kitab sərgisi, fakültələrdə stendlər və guşələr təşkil edilmiş, faciə ilə əlaqədar yazı müsabiqəsi keçirilmişdir.

Tədbirin sonunda “Xocalı” bədii filmi nümayiş etdirilmişdir.

M. YAQUBZADƏ, “Xalq qəzeti”