Kütləvi informasiya vasitələrində xəbər verildiyi kimi, yanvarın 29-da Heydər Əliyev Mərkəzində “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrasının dördüncü ilinin yekunlarına həsr olunan konfrans keçirilib. Konfransda Prezident İlham Əliyev Dövlət Proqramının icrasının 4-cü ili olan 2017-ci ildə Azərbaycan regionlarının inkişafı istiqamətində həyata keçirilən tədbirlərdən əhatəli şəkildə söz açıb.

Görülmüş işlərin miqyasından, regionların inkişafını təmin edən dövlət proqramlarının icrası prosesində qazanılan uğurlardan danışan dövlət başçısı deyib ki, xalqın həyat səviyyəsinin yaxşılaşdırılması istiqamətində həyata keçirilən tədbirlər böyük əhəmiyyət daşıyır. Əsas məqsəd dövlətin qüdrətini artırmaq və müstəqilliyimizi möhkəmləndirməkdən ibarətdir.

Dövlət başçısı bildirib ki, son 14 ildə ölkəmizdə demoqrafik proseslər sürətlə gedib: “Ötən 14 ildə əhalimiz 1,5 milyon nəfər artıb. Bu dövrdə maaş və pensiyalar dəfələrlə artırılıb, önəmli sosial layihələr icra olunub. Minlərlə məktəb, yüzlərlə tibb müəssisəsi, Olimpiya idman kompleksləri inşa olunub. Sahibkarlığın inkişafı diqqət mərkəzində saxlanılıb. “ASAN xidmət” mərkəzlərinin yaradılması ictimai xidmətlər sırasında bir inqilaba çevrilib”.

Bir vətəndaş kimi, məni daha çox məmnun edən məsələlərdən biri də ölkənin nəqliyyat və rabitə sahəsində əldə edilmiş uğurlar barədə deyilənlər oldu.
Prezident qeyd etdi ki, kosmik ölkəyə çevrilən Azərbaycanda icra olunan nəqliyyat və energetika layihələri ölkəmizin uzunmüddətli və uğurlu inkişafını şərtləndirir: “Bakı-Tbilisi-Qars dəmir yolu nəqliyyat dəhlizlərinin yaradılması istiqamətində son illərdə həyata keçirilən ən önəmli layihədir. Bakı-Tbilisi-Ceyhan neft, Bakı-Tbilisi-Ərzurum qaz kəmərləri böyük əhəmiyyət kəsb edir. Bütün bu layihələr ölkəmizin uzunmüddətli inkişafına şərait yaradıb”.

Daha mühüm məqamlardan biri də ölkədə həyata keçirilən islahatların beynəlxalq aləmdə dəstəkləndiyi barədə deyilənlər idi. Prezident xatırlatdı kİ, 2003-cü ildən sonra Azərbaycan böyük uğurlara imza atıb. Ölkəmizdə hərtərəfli inkişaf təmin olunub. Ölkədə aparılan islahatlar dünya birliyi tərəfindən də yüksək qiymətləndirilir. Ölkəmiz təhlükəsizlik, əmin-amanlıq şəraitində uğurla inkişaf edir, inkişaf parametrlərinə və vətəndaş həmrəyliyinə görə dünyada nümunəvi ölkələrdən biridir.

Rüstəm XƏLİLOV,
Milli Məclisin deputatı