Prezident İlham Əliyevin təşəbbüsü ilə birgə ortaq türk tarixi araşdırılacaq, yaradılacaq və yazılacaqdır.

AzərTAc xəbər verir ki, bu sözləri Azərbaycan Milli Elmlər Akademiyası (AMEA) A.Bakıxanov adına Tarix İnstitutunun direktoru, Milli Məclisin deputatı, AMEA-nın müxbir üzvü Yaqub Mahmudov jurnalistlərə müsahibəsində söyləmişdir. Bildirmişdir ki, birgə ortaq türk tarixinin araşdırılması, yaradılması və yazılması istiqamətində AMEA-nın Tarix İnstitutu ilə Atatürk Araşdırma Mərkəzi arasında “Elmi əməkdaşlıq protokolu” imzalanmışdır. Bu istiqamətdə türk tarixçiləri ilə müxtəlif danışıqlar aparılmış və birgə razılıq əldə olunmuşdur.

Y.Mahmudov bu uğuru Prezident İlham Əliyevin Azərbaycan elminə göstərdiyi diqqət və qayğının nəticəsi kimi qiymətləndirmişdir. Türkiyənin Baş naziri Rəcəb Tayyib Ərdoğanın Şəkiyə səfəri zamanı azərbaycanlı alimlər onunla görüşmüş və dövlətimizin başçısının təşəbbüsü ilə qərara alınmışdır ki, Azərbaycan tarixçiləri türkiyəli alimlərlə birgə ümumtürk tarixinin araşdırılması işinə başlasınlar.