Azərbaycan və Rumıniya arasında strateji tərəfdaşlıq xalqlarımızın tərəqqisinə və rifah halının daha da yaxşılaşdırılmasına xidmət edir. Xalqlarımız arasındakı dostluq münasibətləri çox yüksək səviyyədədir.

AzərTAc xəbər verir ki, bu sözləri Heydər Əliyev Beynəlxalq Aeroportunda jurnalistlərə müsahibə verən Rumıniya Deputatlar Palatasının sədri Valeriu Zqonea demişdir.

Ölkələrimiz arasındakı münasibətlərin dinamik inkişaf etdiyini deyən sədr bu səfərin dostluq əlaqələrinin inkişafına təkan verəcəyinə əminliyini vurğulamışdır.

V.Zqonea bildirmişdir ki, səfərinin əsas məqsədi parlamentlərimiz arasında, eləcə də digər sahələrdə əməkdaşlığın daha da genişləndirilməsinə dair fikir mübadiləsi aparmaqdır.