Azərbaycanda icbari tibbi sığortanın tətbiqinin vaxtı çatmışdır. “APA-Economics”in məlumatına görə, bunu maliyyə naziri Samir Şərifov bildirmişdir.

Onun sözlərinə görə, bununla bağlı müvafiq qanunvericilik bazası artıq yaradılmışdır: “Hesab edirəm ki, biz artıq o mərhələyə çatırıq ki, tibbi sığortanı gündəlik həyatımızda tətbiq etməyə başlaya bilərik”.

 Nazir bildirmişdir ki, son illər ərzində ölkədə həyata keçirilən sosial-iqtisadi siyasət nəticəsində Azərbaycanın səhiyyə infrastrukturu yenilənmişdir: “Xəstəxanalar, poliklinikalar, ambulatoriya və s. obyektlərin maddi-texniki vəziyyəti köklü şəkildə dəyişmişdir. Əksər xəstəxanalar, əksər səhiyyə müəssisələrinin inzibati binaları yenidən qurulmuş və ya yenidən tikilmiş, onlar müasir avadanlıqla təchiz edilmişlər”.

 S.Şərifov qeyd etmişdir ki, Azərbaycandan həkimlərin xaricə təcrübə mübadiləsi üçün göndərilməsi, xaricdən Azərbaycana səhiyyə mütəxəssislərinin dəvət olunması tibb xidməti səviyyəsini yaxşılaşdırmışdır: “Bu sahədə müsbət irəliləyişləri artıq görürük. Müəyyən problemlər də var - onsuz olmur, amma hazırda biz bu sahəyə sığorta prinsiplərinin daha aktiv şəkildə tətbiq edilməsi prosesinə başlaya bilərik”.