Qaraciyər transplantasiya əməliyyatları 2008-ci ildən Səhiyyə Nazirliyinin tabeliyində olan Mərkəzi Neftçilər Xəstəxanasında (MNX) icra olunur. Azərbaycanda transplantologiyanın tarixi yeni deyildir. Hələ 1971-ci ildə ilk dəfə akademik Mirməmməd Cavadzadə tərəfindən Respublika Uroloji Klinik Xəstəxanasında böyrək transplantasiyası keçirilmişdir.
Bu sözləri aprelin 10-da keçirilən mətbuat konfransında MNX-nin baş həkimi Həbib Yüzbaşıyev demişdir.
Baş həkim bildirmişdir ki, xəstəxanada indiyədək 18 böyrək və 20 qaraciyər transplantasiyalarının icra olunması bunun məntiqi nəticəsidir.
Azərbaycan cərrahiyyəsində yeni bir səhifənin açıldığını deyən H.Yüzbaşıyev diqqətə çatdırmışdır ki, xəstəxanadakı son unikal əməliyyat MDB məkanında ilk dəfə Azərbaycanda keçirilmişdir. Belə ki, aprelin 4-də iki canlı donordan xəstəyə eyni vaxtda qaraciyər və böyrək köçürülmüşdür.
Həkimlər Mircəlal Kazımi, Eldar Əhmədov, Elnur Fərəcovun keçirdikləri əməliyyat 24 saat davam etmişdir.
Qeyd olunmuşdur ki, xəstəxanadakı Qaraciyər Transplantasiya Mərkəzi Avropa Qaraciyər Transplantasiyası Reyestrində fəal qaraciyər köçürülməsini icra edən mərkəz kimi qeyd olunmuşdur.
Tədbirdən sonra media nümayəndələri üzərində əməliyyat aparılmış xəstəyə baş çəkmişlər. Hazırda xəstənin vəziyyəti yaxşıdır.