Azərbaycanın birinci xanımı, Heydər Əliyev Fondunun prezidenti Mehriban Əliyeva martın 7-də Milli Onkologiya Mərkəzinin yeni tikilmiş uşaq klinikası ilə tanış olmuşdur.
Mehriban xanım Əliyevaya gül dəstəsi təqdim edildi.
Hər bir dövlətin əsas öhdəliklərindən biri də xalqın sağlam gələcəyini təmin etməkdir. Əsası ulu öndər Heydər Əliyev tərəfindən qoyulan və bu gün də Prezident İlham Əliyevin uğurla davam etdirdiyi sosialyönümlü siyasətin nəticəsidir ki, gələcəyimiz olan uşaqların sağlamlığına xüsusi əhəmiyyət verilir. Bu işdə Azərbaycanın birinci xanımı, Heydər Əliyev Fondunun prezidenti Mehriban Əliyevanın böyük xidmətləri vardır. Uşaqlara diqqət və qayğı, xüsusilə də onların sağlamlığı ilə bağlı məsələlər fondun fəaliyyətində prioritet istiqamətlərdən birini təşkil edir. Fondun səhiyyə sahəsində reallaşdırdığı layihələr sırasında "Talassemiyasız həyat", "Diabetdən əziyyət çəkən uşaqlara qayğı" və digər proqramlar vardır.
Milli Onkologiya Mərkəzinin uşaq klinikasının istifadəyə verilməsi səhiyyənin ən ağrılı problemlərinin həlli istiqamətində görülən əvəzsiz işdir. Klinika müasir təbabətin qlobal problemlərindən olan uşaqlarda onkoloji xəstəliklərin fəsadlarına qarşı mübarizədə çox mühüm funksiyanı yerinə yetirəcəkdir.
Respublika Uşaq Xəstəxanasında fəaliyyət göstərən 10 çarpayılıq bir bölmə tərəfindən göstərilən yardım onkoloji xəstəliyə düçar olan uşaqların böyük əksəriyyətini əhatə etmirdi. Tikintisinə 2009-cu ildən başlanılmış və artıq hazır olan Milli Onkologiya Mərkəzinin uşaq klinikasının binası dördmərtəbəlidir. Klinikanın həyətində xüsusi zövqlə yaradılmış uşaq meydançası da vardır. Səhiyyə ocağının yerləşdiyi ərazinin ümumi sahəsi 5 min 200 kvadratmetrdir. Məhz uşaqlar üçün nəzərdə tutulduğundan görkəmi ilə digər səhiyyə ocaqlarından fərqlənən bu klinikanın birinci mərtəbəsində poliklinika şöbəsi və müxtəlif diaqnostik kabinetlər, ikinci və üçüncü mərtəbələrdə hər biri 30 çarpayılıq müalicə şöbələri, dördüncü mərtəbədə isə iki əməliyyat otağı olan cərrahi blok və reanimasiya şöbəsi yerləşir.
Klinikada konfrans zalı, arxiv, xidməti otaqlar vardır.
Burada mərkəzləşmiş havalandırma, yanğından mühafizə və rabitə sistemləri, həmçinin təhlükəsizliyin təmin edilməsi üçün müşahidə kameraları quraşdırılmışdır.
Milli Onkologiya Mərkəzinin uşaq klinikasının istifadəyə verilməsi bu sahədəki problemlərin həlli istiqamətində irəliyə atılan vacib addımdır.
Milli Onkologiya Mərkəzinin direktoru, akademik Cəmil Əliyev Azərbaycanın birinci xanımına məlumat verdi ki, respublikada onkoloji xəstəliyi olan 1000 nəfərə yaxın uşaq vardır. Klinikanın açılması ilə bu xəstələrin xaricdə müalicə almasına ehtiyac qalmayacaqdır. Mərkəzin uşaq klinikası ən müasir tələblərə cavab verən tibbi müəssisə kimi layihələşdirilərək tikilmişdir. Uşaqların özlərini rahat hiss etmələri üçün klinikanın dəhlizlərinin divarları müxtəlif nağılların və cizgi filmlərinin qəhrəmanlarının şəkilləri ilə bəzədilmişdir. Bu isə klinikadakı ümumi şə-raiti ev şəraitinə yaxınlaşdırır, qeyri-xəstəxana ab-havası yaradır. Foyedə quraşdırılmış xüsusi monitorlarda klinikada olan bütün dərmanların siyahısı göstərilir.
Azərbaycanın birinci xanımı Mehriban Əliyeva əməliyyat və reanimasiya şöbələrində yaradılan şəraitlə tanış oldu. Burada iki əməliyyat otağı yerləşir. Bu otaqlar müasir narkoz aparatı, laminar hava axını, funksional əməliyyat masası, ən qabaqcıl tibbi cihazlar ilə təchiz edilmişdir. Həmçinin, burada bakterosid və yanğına davamlı divarlar qurulmuşdur. Reanimasiya şöbəsi xüsusi avadanlıq vasitəsilə daim nəzarət altında saxlanılır. Bu şöbədə ən müasir süni tənəffüs aparatları vardır. Monitorlarda isə xəstənin təzyiqi, ürəyin kardioqramı, bədənin temperaturu, bir sözlə, pasiyentin bütün həyat parametrləri göstərilir.
Klinikada 24 saat ərzində fəaliyyət göstərən ekspress-laboratoriya da vardır. Tibb müəssisəsində uşaqlar yüksək dozalı dərmanlar qəbul edirlər. Bu səbəbdən onlar hər dörd saatdan bir analiz verir ki, bu dərmanların orqanizmdə sovrulması yoxlanılsın. Bu laboratoriyanın əsas məqsədi - pasiyentlərdə digər patalogiyaların yaranmasının qarşısını almaqdır.
Tibb müəssisəsinin hər mərtəbəsində mətbəx, camaşırxana vardır. Xəstələrin yanına gələnlər uşaqlar ilə istirahət otaqlarında da görüşə bilərlər. Klinikada çoxlu stasionar palatalar vardır. Uşaq şöbəsində balacaların zövqünə və yaşına uyğun qurulan hər palatanın ayrıca vanna otağı, televizoru və müalicə almaq üçün lazımi şərait vardır. Palatalarda valideynlərin övladlarının yanında qalması da nəzərə alınmışdır.
Bir məqamı da xüsusi qeyd etmək lazımdır ki, pediatrik yaş həddində, yəni 15-16 yaşadək olan onkoloji və hemotoloji xəstələr vaxtında klinikaya müraciət edərsə, onların tam sağalması mümkündür.
Klinikanın hər şöbəsində sümük iliyi, lyumbar punksiyalar və biopsiyaları üçün manipulyasiya otağı fəaliyyət göstərir. Bu otaq həm diaqnostik məqsədlər, həm də müalicənin səmərəliliyini araşdırmaq üçün yaradılmışdır. Klinikada müalicə olunan uşaqların tam sağalması üçün onların 1-2 il ərzində kimyəvi terapiya keçməsi vacibdir.
Tibb müəssisəsində məktəbli yaşında olan xəstə uşaqların tədrisi də nəzərə alınmışdır. Onlar üçün kompyuterlər ilə təchiz edilmiş dərs otağı yaradılmışdır. Dərs otağı müalicə aldıqları zaman uşaqların tədrisdən təcrid olunmaması məqsədi ilə qurulmuşdur.
Uşaq şöbəsində isə məktəbəqədər uşaqlar müalicə alacaqlar. Buradakı oyun və dərs otağı da məhz məktəbəqədər uşaqların tələbatlarına və maraqlarına uyğun yaradılmışdır.
Mehriban xanım Əliyeva klinikada müalicə olunan 2 yaşlı Nuray Abdulrəhmanlı və onun anası ilə görüşdü, balaca pasiyentin səhhəti ilə maraqlandı. Qax rayonundan olan Nuray göz almasının retinoblastoması diaqnozu ilə səkkiz ay əvvəl akademik Zərifə Əliyeva adına Milli Oftalmologiya Mərkəzində əməliyyat olunmuşdur. Onun gözünə implantant qoyulmuşdur.
Heydər Əliyev Fondunun prezidenti Nuray ilə söhbət etdi, hədiyyə verdi və ona tezliklə sağalmağı arzuladı.
Klinikanın daha bir pasiyenti - 11 yaşlı Zübəndə Xəlilovadır. Ucardan olan Zübəndə burun-udlağın karsinomasından müalicə olunur. Mehriban xanım Əliyeva Zübəndə ilə söhbət zamanı ona tezliklə sağalıb, məktəbə qayıtmağı arzuladı və ona hədiyyə təqdim etdi. Zübəndə Xəlilovanın anası klinikada müalicə üçün bütün şəraitin yaradıldığını dedi və buna görə minnətdarlığını bildirdi. Sonra xatirə şəkli çəkdirildi.
Şüa müalicəsinə ehtiyacı olan xəstə uşaqların binadan çıxmadan şüa terapiyası avadanlığının yerləşdiyi bunkerlərə getməsi üçün xüsusi keçid tikilmişdir. Burda çalışan mütəxəssislər Almaniya və Türkiyədə təcrübə keçmişlər. Xətti gücləndirici şüa terapiyası 3G formatlı cihazla təchiz edilmişdir.
Maqnit-rezonans tomoqrafiyası kabinetində xüsusi aparat vasitəsilə baş-beyin, qarın boşluğunda, yumşaq toxuma və sümükdə olan patalogiyalar müəyyən edilir.
Rentgen-idarəetmə otağında isə rəqəmsal rentgen aparatı vasitəsilə ağ ciyər, qida borusu, mədə-bağırsaq və qarın boşluğunun ən dəqiq göstəricilərini əldə etmək mümkündür.
Azərbaycanın birinci xanımı Mehriban Əliyeva yeni tikilmiş klinikanın kollektivini təbrik etdi, onlara işlərində uğurlar arzuladı.
Sonda xatirə şəkli çəkdirildi.

AzərTAc