Bu gün Azərbaycanın müasir dövlət siyasətində cəmiyyətin əsasını təşkil edən ailələrin sağlamlığının  möhkəmləndirilməsi, ailə dəyərləri və milli ənənələrin qorunub saxlanılması, uşaqların firavan inkişafının təmin edilməsi prioritet məsələlərdən biridir. Dünən, iyulun 11-də “Sağlamlığın Qorunması” İctimai Birliyi Gədəbəy rayonunun Samanlıq kəndindəki Aşıqlar evində  şəhid ailələrinə həsr olunan “Sağlam nəsil, sağlam gələcək” adlı tədbir həyata  keçirib.

   “Paytaxt Bakıdan fərqli olaraq Azərbaycanın ucqar rayon və şəhərlərində keçirilən tədbirlərin bir xüsusi əhəmiyyəti var. Orda insanlar gözdən-könüldən bir az uzaq olurlar, onlar diqqət və qayğıya daha çox ehtiyac duyurlar. “Sağlamlığın Qorunması” İctimai Birliyi də elə bu məqsədlə şəhid ailələrinə həsr olunan “Sağlam nəsil, sağlam gələcək” adlı konfransı məhz Gədəbəy rayonunda təşkil etdi. Ulu öndər Heydər Əliyevin abidəsini və Şəhidlər Xiyabanını ziyarət etdikdən sonra konfransımıza başladıq”.-- Bu fikirləri

 “Sağlamlığın Qorunması” İctimai Birliyinin rəhbəri, tibb üzrə fəlsəfə doktoru  Yazgül Abdıyeva deyib.

Qeyd edək ki, o, konfransda “Korluğun qarşısının alınması üçün profilaktik tədbirlərin görülməsi” mövzusunda çıxış edib. O, üzünü sakinlərə tutaraq, gözləri korluq səviyyəsinə çatdırmamaq  üçün vaxtaşırı profilaktiki tədbirlərə əməl etməyin, hər hansı problem hiss edən kimi, oftalmoloqun məsləhəti ilə müayinədən keçməyin vacibliyini bildirib. Eyni zamanda, o, doğma yurdun gözəlliyindən, təmiz, saf dağ havası kimi insanlarının da məğrur, mehriban və qonaqpərvər olmalarından duyğulandığını bildirib.

Konfransda, həmçinin,  “Öd daşı xəstəliklərində maddələr mübadiləsi prosesinin pozulması”,  “Reproduktiv sağlamlığın qorunması” və digər mövzular müzakirə edilib. Milli Məclisin deputatları Qənirə Paşayeva və Sevinc Hüseynova, həkimlər-- tibb üzrə fəlsəfə doktorları--Kəmalə Talışınski və Müşfiq Həsənov,  şəhid ailələri, Gədəbəy sakinlərinin iştirak etdikləri tədbirdə məruzə edilən mövzularla bağlı yaranan  suallara aydınlıq gətirilib. Bildirilib ki, insanların sağlamlığı təkcə tibbi deyil, həmçinin sosial, iqtisadi və ictimai problemdir. Ona görə də belə  maarifləndirmə tədbirlərinin təşkili olduqca vacibdir.

Konfrans iştirakçıları arasında ailədə harmonik münasibət, yardım, qarşılıqlı kömək və sağlamlıq vərdişlərinin uşaqların inkişafında böyük rol oynaması və s. kimi məsələlər müzakirə edilib, qarşılıqlı fikir mübadiləsi aparılıb.

Zərifə BƏŞİRQIZI,

“Xalq qəzeti”