Akademik Zərifə Əliyeva adına Milli Oftalmologiya Mərkəzinin Dəmiryolu səyyar klinikası növbəti aksiyasını Gəncə şəhərində pasientlərə tibbi xidmət göstərməklə reallaşdırıb. 2 gün davam edən tədbirdə məqsəd operativ şəkildə gəncəli pasientləri müayinə-müalicə, hətta cərrahi əməliyyat etmək olub. Lazım gəldikdə ciddi problemlərlə üzləşən və çətin əməliyyat tələb olunan pasientlərin paytaxtda yerləşən Milli Oftalmologiya Mərkəzinə, eyni zamanda mərkəzin Gəncə filialına gəlmələrinə şərait yaradılıb.

İkinci humanitar aksiyasına başlayan Dəmiryolu səyyar klinikası ölkənin dəmiryolu xətti yerləşən bütün regionlarında, eləcə də Gürcüstan--Azərbaycan sərhədi ərazisində fəaliyyət göstərəcək. Səhiyyə Nazirliyinin dəstəyi ilə  yüksək ixtisaslı oftalmoloji, xüsusilə cərrahi yardım göstərmək üçün müasir diaqnostik və cərrahi avadanlıqla təchiz olunan  səyyar qatarın uzunluğu  25, eni 3 metrdir. Bir gün ərzində klinikanın həkim və orta tibb briqadası  vaqonda 300-dən çox müayinə-müalicə və 30 əməliyyat edə bilər. Qatarda oftalmoloji müayinələr üçün bölmə -- avadanlıq və oftalmoloq yerindən ibarətdir. Müayinələr üçün avadanlıqlar foropter, refraktometr, tonometr, işarələr proyektoru, yarıq lampa, lensmetr və digərləri təşkil edilib. İlk dəfə olaraq mayın 8-dən 12-ə kimi Astarada keçirilən bu humanitar aksiya ölkənin dəmiryolu xətti yerləşən bütün regionlarında, eləcə də Gürcüstan-Azərbaycan sərhədi ərazisində fəaliyyət

göstərəcək.

Zərifə BƏŞİRQIZI,
“Xalq qəzeti”