Kənd Təsərrüfatı Nazirliyi yanında Dövlət Baytarlıq Nəzarəti Xidməti (DBNX), Kənd Təsərrüfatının Rəqabət Qabiliyyətinin Gücləndirilməsi Layihəsi və Azərbaycan Dövlət Aqrar Universitetinin (ADAU) birgə həyata keçirdikləri əməkdaşlıq çərçivəsində Aqrar Universitetin Baytarlıq təbabəti və zoomühəndislik fakültəsinin 14 nəfər tələbəsi martın 5-dən 11-dək  Bakı şəhərinə ezam olunmuşlar.

 Məqsəd tələbələrin “Baytarlıq şəhərciyində” yerləşən DBNX, Respublika Baytarlıq Laboratoriyası (RBL), Baytarlıq Elmi-Tədqiqat İnstitutu (BETİ) və Kənd Təsərrüfatı Muzeyi ilə tanış olmaq,  həmçinin Bakı şəhərində fəaliyyət göstərən baytarlıq-sanitariya ekspertiza laboratoriyasında, özəl baytarlıq fəaliyyəti ilə məşğul olan qeyri-hökumət (Bakı şəhəri ətrafında yerləşən “İdeya” heyvanlara qayğı mərkəzi)  təşkilatında görüşlər keçirməkdir.

Universitet tələbələri martın 5-də DBNX-də olublar. Mütəxəssislər tərəfindən Dövlət Xidmətinin strukturu, xidmət tərəfindən görülən tədbirlər, qarşıda duran vəzifələr və məqsədlər barəsində onlara ətrafı məlumat verilib.

Tələbələr həmin gün “Baytarlıq şəhərciyində” yerləşən Kənd Təsərrüfatı Muzeyi ilə də tanış olublar. Tarixi eksponatlarla zəngin olan muzeyin ayrı-ayrı guşələri onlarda maraq oyadıb.

Tədbirlər planına əsasən sonrakı günlərdə ADAU tələbələrinin baytarlıq sahəsinə və qida təhlükəsizliyinə xidmət göstərən müasir avadanlıqlarla təchiz edilmiş RBL və ETBİ ilə tanış olmaları nəzərdə tutulub. Bu isə tələbələrin gələcək ixtisas seçiminin formalaşmasına şərait yaradacaq.

Z.BƏŞİRQIZI,
“Xalq qəzeti”