Ailə, Qadın və Uşaq Problemləri üzrə Dövlət Komitəsinin və Almaniya Beynəlxalq Əməkdaşlıq Cəmiyyətinin (GİZ) birgə əməkdaşlığı  ilə “Liderlik təlimatı” adlı vəsait hazırlanıb. Vəsait  daxili siyasətdə təmsil olunan qadınlara həsr olunub.  Vəsaitin  əsas  məqsədi   bələdiyyələrdə, yerli icra hakimiyyəti orqanlarında, özəl şirkətlərdə çalışan qadınların şəxsi keyfiyyətlərini inkişaf etdirməkdir.

“Liderlik təlimatı” vəsaiti ali təhsil ocaqlarında təhsil alan tələbələrə və elmi araşdırma sahələrində fəaliyyət göstərən alimlərə  kömək  ola bilər.

Vəsaitdə liderlik, liderliyin tərzləri, liderlik xüsusiyyətləri, qadın hüquqları, yerli səviyyədə qadın iştirakçılığı, təşviqat və ictimai məlumatlandırma, hüquqi mexanizmlər, praktik məşğələ-liderlik dəyərləri və digər məsələlər əks olunub. Vəsait qadın hüquqlarının müdafiəsi və gender bərabərliyinin təmin edilməsi məqsədilə hazırlanıb. “Liderlik təlimatı” vəsaitinin müəllifləri isə ADA Universiteti Fondunun prezidenti Natiq Hacıyev, Almaniya Beynəlxalq Əməkdaşlıq Cəmiyyətinin eksperti (Cənubi Qafqazda Yaxşı Yerli Özünü İdarəetmə Proqramı) Fidan Qasımova və Ailə, Qadın və Uşaq Problemləri üzrə Dövlət Komitəsinin informasiya və analitik araşdırmalar şöbəsinin müdiri  Elgün Səfərovdur. Təlimatın hazırlanmasında Almaniya Federativ Respublikasının, Fransanın, Böyük Britaniyanın və digər dövlətlərin təcrübələrindən istifadə edilib.

Ü.VAHİDQIZI,

“Xalq qəzeti”