Sentaybrın 29-da Azərbaycan Respublikasının Prezidenti yanında Bilik Fondu və Milli Azərbaycan Tarixi Muzeyinin birgə təşkilatçılığı ilə "Şərqşünas alim Aida xanım İmanquliyevanın yaradıcılığında ərəb məhcər ədəbiyyatına multikultural baxış” mövzusunda seminar keçirilib.

Tarix muzeyində təşkil olunan seminarda Bakı Dövlət Universiteti şərqşünaslıq fakültəsinin və Azərbaycan Maliyyə-İqtisad Kollecinin tələbələri iştirak ediblər.

Seminarda muzey direktorunun elmi işlər üzrə müavini Nərgiz Əliyeva, elmi işçi Əli Fərhadov, Bilik Fondunun sektor müdiri Hacı Abdulla, BDU şərqşünaslıq fakültəsi dekanının müavini Hüseyn Sadıqov, tədqiqatçı-tərcüməçi Ramazan Əsgərli maraqlı məruzələrlə çıxış ediblər.

Bilik Fondunun lektorlar qrupunun üzvü, gənc alim Əli Fərhadovun "Aida İmanquliyevanın yaradıcılığında ərəb məhcər ədəbiyyatına multikultural baxış" mövzusunda mühazirəsi maraqla qarşılanıb. Tədqiqatçı Azərbaycanla ərəb dünyasının ədəbi, fəlsəfi-mədəni əlaqələrinin hərtərəfli tədqiqində tanınmış şərqşünas alim Aida İmanquliyevanın rolu və yaradıcılığı haqqında iştirakçılara ətraflı məlumat verib.

Bilik Fondunun mətbuat xidməti bildirir ki, sonda iştirakçıların sualları cavablandırılıb.

“Xalq qəzeti”