İ.M.Seçenov adına Birinci Moskva Dövlət Tibb Universitetinin Bakı filialının tələbə və müəllimlərinin akademik Roald Saqdeyev və professor Vladimir Zelmanla görüşü olub.

Cənubi Kaliforniya Universitetinin (ABŞ, Los-Anceles) anesteziologiya və reanimotologiya kafedrasının rəhbəri, professor Vladimir Zelman ABŞ-ın üç ən yaxşı anestezioloqundan biridir. O, Rusiya Tibb Elmləri Akademiyasının fəxri üzvü, Rusiya Elmlər Akademiyasının əcnəbi üzvü (2014-cü il), Sankt-Peterburq Hərbi Tibb Akademiyasının, Novosibirsk Dövlət Tibb Universitetinin fəxri professoru, Rusiyanın “Skolkovo” İnnovasiya Mərkəzinin müşahidə şurasının üzvü, Seçenov Universitetinin fəxri professorudur.

Professor Vladimir Zelman neyroelmlər sahəsində liderlərdən və ABŞ-da neyroanesteziologiyanın pionerlərindən biridir. O, beyin fəaliyyətinin öyrənilməsinə həsr olunmuş böyük beynəlxalq elmi-tədqiqat layihələrinə qoşulur və belə layihələr təşkil edir.

Professor V.Zelman Cənubi Kaliforniya Universitetinin əməkdaşlarının başqa təşkilatlardan olan həmkarlarla tərəfdaşlıq şəraitində bu sahədə əldə etdikləri ən maraqlı nəticələrdən danışıb. Cənubi Kaliforniya Universitetinin Zilka adına Neyrogenetika İnstitutunun alimləri artıq bir neçə ildir Yel Universitetinin və Allen adına Beyin İnstitutunun bir qrup əməkdaşı ilə birgə tədqiqat aparırlar. Onların məqsədi inkişaf edən insan beyninin tam genetik məlumat bazasını yaratmaqdır. Alimlərin fikrincə, belə baza müxtəlif beyin pozulmalarının yaranmasının genetik riskini dəyərləndirməyə imkan verəcək. Artıq mərkəzi sinir sisteminin patologiyası ilə bağlı olan 300-dən çox genetik lokus eyniləşdirilib. Hazırda dünyada ən böyük baza sayılan bu baza 2011-ci ildən bütün əlaqədar istifadəçilərin sərəncamına verilib.

AZƏRTAC