Bakı şəhəri üzrə ümumi təhsil məktəblərinin X və XI sinif şagirdləri arasında II ingilis dili olimpiadası keçiriləcək.

Təhsil Nazirliyindən aldığımız məlumatda deyilir ki, olimpiadanın keçirilməsində əsas məqsəd şagirdlərdə xarici dilin öyrənilməsinə marağı artırmaq, şagirdlərin müvafiq bilik və bacarıqlarını bir daha sınaqdan keçirmək, onların əldə etdikləri xarici dil biliklərini möhkəmləndirməkdən ibarətdir.

Olimpiadanın fevralın 19-da keçiriləcək ilk turunda şagirdlərin ingilis dilinin qrammatikası üzrə bilikləri və mətni oxuyub anlama bacarıqları yoxlanılacaq. Yüksək nəticə göstərmiş şagirdlər olimpiadanın martın 12-də keçirilməsi nəzərdə tutulan ikinci turunda iştirak edəcək və onların dinləmə, esse yazma qabiliyyətləri yoxlanılacaq.

Olimpiadada iştirak etmək üçün məktəblilər fevralın 14-dək www.olympiad.ada.edu.az saytında qeydiyyatdan keçə bilərlər.

Şagirdlərin qeydiyyatı prosesinə kömək göstərilməsi üçün ümumi təhsil müəssisələrində koordinator-müəllimlər təyin edilib.

Qeyd edək ki, II ingilis dili olimpiadası “ADA” Universitetinin təşkilatçılığı ilə keçirilir.

 Samirə Əliyeva,
“Xalq qəzeti”